Aýa raıy
Astana -13 °S
Almaty 0 °S
valıýta baǵamy
USD 421.58
EUR 496.83
RUB 5.53
CNY 62.20

Almaty oblysynda 82 jastaǵy keıýana birinshi ret jeke kýálik aldy

2020 jyldyń 24 qyrkúıek 2020 09:50

TALDYQORǴAN. QazAqparat - Almaty oblysynda keıýana 82 jasynda óziniń alǵashqy kýáligin aldy, dep habarlaıdy QazAqparat tilshisi.

Egde jastaǵy azamatshaǵa qujatty Almaty oblysy polıtsııa departamentiniń kóshi-qon qyzmeti tabystady. Odan ózge taǵy úsh turǵyn ózderiniń jeke tulǵasyn alǵash ret resmı túrde tirkedi. Budan bylaı bul azamattar Qazaqstan Respýblıkasynyń teń quqyly azamattary sanalyp, laıyqty zeınetaqysyn ala alady.

«Bizge qıyn jaǵdaıǵa tap bolǵan adamdarǵa arnalǵan ońaltý ortalyǵynyń qyzmetkeri júgindi. Ol jeke basyn kýálandyratyn qujaty joq úsh adamnyń ortalyqqa ornalasqanyn jetkizdi. Bul adamdardyń eshqashan qujaty bolmaǵan. Keıbiriniń tipti azamattyǵy da joq edi. Barlyq qajetti qujattardy jınap, tıisti organdarǵa suranys joldaı otyryp, biz olarǵa kýálik tapsyrdyq. Endi olar bizdiń barlyq azamattarymyz sııaqty memlekettik zeınetaqyǵa úmitker bola otyryp, kúnkóris úshin qarajat ala alady», -dep habarlady Almaty oblysy PD kóshi-qon qyzmeti basqarmasy bastyǵynyń orynbasary, polıtsııa polkovnıgi Elmurat Nurseıitov.

Spıker bul is-sharanyń bir rettik aktsııa emes, turaqty negizde ótkiziletinin habarlady.

«Sondaı-aq, biz qujatyn alyp kete almaıtyn azamattarǵa aparyp beremiz jáne qujattaýǵa baılanysty týyndaıtyn máselelerde kómek kórsetemiz. Aıta ketý kerek, jyl basynan beri Qazaqstan azamattyǵyna 7508 azamat qabyldandy. 353 adam Qazaqstan Respýblıkasynyń azamaty dep tanyldy. Jalpy oblys boıynsha jıyrma bes myńnan astam shetel azamaty tirkelgen. Kóshi-qon zańnamasyn buzǵany úshin 159 sheteldik elden shyǵaryldy»,-dep tolyqtyrdy polıtsııa polkovnıgi Elmurat Nurseıitov.





Avtor Samal Qabysheva
Basty sózder: Almaty oblysy, Qoǵam,
Joǵary qaraı