Aýa raıy
Astana -13 °S
Almaty 0 °S
valıýta baǵamy
USD 421.58
EUR 496.83
RUB 5.53
CNY 62.20

Qorǵanys mınıstrligi áskerge ınnovatsııalardy belsendi engizý qajettigin atap ótti

2020 jyldyń 22 qyrkúıek 2020 18:57

NUR-SULTAN. QazAqparat - Aldaǵy aptanyń basty is-sharasy «Aldaspan-2020» iri aýqymdy jedel-taktıkalyq komandalyq-shtabtyq oqý-jattyǵýdyń qorytyndy kezeńi bolmaq. Osy oraıda, Qorǵanys mınıstri Nurlan Ermekbaev Bas qolbasshylardyń nazaryn qaýipsizdik sharalaryn saqtaýǵa jáne oqý-jattyǵý barysynda barlyq oqý-jaýyngerlik mindetterdi sapaly oryndaýǵa aýdardy.

Apparattyq keńestegi negizgi máseleniń biri áskerlerdiń tirshilik áreketiniń negizderine kedergi keltirýi múmkin túıitkilder boldy.

Bas qolbasshylardyń baıandamasy boıynsha kazarmalar men qazandyqtardyń jylytý maýsymyna daıyndyq máselesi shuǵyl sheshýdi talap etedi. Bul aýa raıynyń salqyndaýyna baılanysty qajet bolyp otyr. Jergilikti jerlerdegi aqparat boıynsha, merzimderdi sozýdyń negizgi sebebi merdigerlik uıymdardyń baıaý jumys isteýinde ekendigin aıta ketken jón. Biraq qorǵanys vedomstvosy basshysynyń buryn bergen nusqaýlaryn eskere otyryp, barlyq kúsh-jiger Qarýly Kúshterdiń ınfraqurylymyn qysqy kezeńge sapaly jáne der kezinde daıyndaýǵa baǵyttalýy tıis.

Qorǵanys mınıstri Bas qolbasshylarǵa jergilikti jerlerdegi ákimdiktermen qysqa daıyndyq boıynsha ózara is-qımyl jasaý, sondaı-aq jóndeý-qalpyna keltirý bólimsheleriniń osy qyzmetke qatysý múmkindigin pysyqtaýǵa tapsyrma berdi. Qajet bolǵan jaǵdaıda talap-aryz jumysyn uıymdastyrý máselesi de sóz boldy. Vedomstvo basshysy bul jumystardy barlyq múddeli uıymdar men mekemelerdi tarta otyryp, birlesip júrgizý kerektigin atap ótti.

Qorǵanys mınıstri qarý-jaraq pen áskerı tehnıkanyń jańa túrlerin ıgerýdi uıymdastyrý, materıaldyq bólim jeke quramynyń bilimi men iskerligin jetildirý qajettigine basa nazar aýdardy.

Bul úshin qarý-jaraq pen áskerı tehnıka úlgilerin, ásirese qarýlanýǵa jańadan kelip túsetin úlgilerdi paıdalanýdyń esebin júrgizý, olardyń oń jáne teris jaqtaryn anyqtaý, zaýyttyq kemshilikterdi joıý jóninde usynystar daıyndaý qajet.

Áýe kemeleri men teńiz kemeleriniń otandyq óndirisin damytý perspektıvalary boıynsha Áýe qorǵanysy kúshteri men Áskerı-teńiz kúshteriniń bas qolbasshylary Indýstrııa jáne ınfraqurylymdyq damý mınıstrligin Qarýly Kúshterdiń osy tehnıkaǵa qajettilikteri jáne onyń qajetti sıpattamalary týraly habardar etýge nusqaý aldy.

Keńeste qorǵanys vedomstvosynyń basshysy sondaı-aq áskerlerdiń tynys-tirshiligin uıymdastyrýda ınnovatsııalyq tásilderdiń jetkiliksiz engizilgenin atap ótti. Máselen, maýsym aıynda áskerlerge jańa oqý modýlderi men sıtýatsııalyq keıster ázirlenip, engizildi. Olardyń mindeti jalpy bilim berý deńgeıin arttyrý, sondaı-aq jeke quramdy saýatty áreket etýge, kúrdeli jaǵdaılarda neǵurlym oryndy sheshim qabyldaýǵa úıretý bolyp tabylady. Alaıda, osy ýaqytqa deıin birqatar áskerı bólimder bul ázirlemelerdi óz deńgeıinde qoldana almaı otyr. General-leıtenant Nurlan Ermekbaev áskerı qyzmetshilerdi oqytýdyń jańa nysandaryn engizý jónindegi tapsyrmalardy oryndaý úshin eki apta merzim berdi.

Budan bólek, Qorǵanys mınıstrliginiń qurylymdyq bólimsheleriniń memlekettik qyzmetter kórsetýiniń jekelegen máseleleri tolyq sheshilgen joq. Atap aıtqanda, osy ýaqytqa deıin áskerı qyzmetshilerge turǵyn úıge muqtajdar esebine qoıý úshin anyqtamalar elektrondyq úkimet portalynda osyndaı qyzmettiń bolýyna qaramastan qaǵaz nysanynda beriledi. Bul qosymsha qaǵazbastylyqqa ákelip qana qoımaı, sybaılas jemqorlyq quqyq buzýshylyqtarǵa alǵysharttar jasaıdy. Munyń sebepteri-málimetter bazasy men baǵdarlamalyq jasaqtamany qalyptastyrýdaǵy kemshilikter bolyp tabylady. Áskerı vedomstvo basshysy atalǵan qyzmetti tsıfrlyq formatqa aýystyrý múmkindigin qamtamasyz etýdi tapsyrdy.

Qorǵanys mınıstri barlyq talaptardyń belgilengen merzimde oryndalýyna qatań nusqaý berdi. «Tapsyrmalar jedel jáne dál oryndalýy kerek. Eger bireý ony júzege asyra almasa, onda bul laýazymda oǵan oryn joq»,-dep óz sózin túıindedi qorǵanys vedomstvosynyń basshysy.


Basty sózder: QR Qorǵanys mınıstrligi,
Joǵary qaraı