Aýa raıy
Astana 12 °S
Almaty 17 °S
valıýta baǵamy
USD 412.55
EUR 468.66
RUB 5.79
CNY 58.80

QR Prezıdenti Qarýly Kúshterdi zaman talabyna saı jasaqtaý jóninde tapsyrma berdi

2019 jyldyń 12 qarasha 2019 15:58

NUR-SULTAN. QazAqparat – Memleket basshysy Qasym-Jomart Toqaev Qorǵanys mınıstri Nurlan Ermekbaevty qabyldady, dep habarlaıdy Aqorda.

Qazaqstan Prezıdenti – Qarýly Kúshterdiń Joǵarǵy Bas qolbasshysy Qasym-Jomart Toqaev Qorǵanys mınıstriniń Qazaqstan áskeriniń qazirgi ahýaly men damý perspektıvalary týraly esebin tyńdady.

Nurlan Ermekbaev Memleket basshysyna Arys qalasyndaǵy tótenshe jaǵdaıdyń saldaryn joıý týraly baıandady. Áskerı vedomstvo basshysynyń aıtýynsha, elimizdegi barlyq oq-dári qoımalaryna tekserý júrgizilgen. Nátıjesinde atalǵan nysandardy qajetti qaýipsizdik deńgeıine jetkizý jáne ońtaılandyrý jospary daıyndalǵan.

Qorǵanys mınıstri vedomstvonyń ortalyq apparatynyń qyzmetine fýnktsıonaldy taldaý júrgizýdiń birinshi kezeńi týraly esep berdi. Onyń aıtýynsha, atqarylǵan jumystardyń nátıjesinde mınıstrliktiń, bas shtabtyń jáne áskerı basqarmanyń jergilikti organdarynyń 300-den asa shtattyq birligi ońtaılandyryldy. Sonyń esebinen 2020 jyldan bastap jyl saıynǵy únem 450 mıllıon teńgeden asatyn bolady. Bul qarjy áskerı quramdy materıaldyq turǵydan yntalandyrýǵa baǵyttalady.

Sonymen qatar Nurlan Ermekbaev Qasym-Jomart Toqaevqa kezekti ásker qataryna shaqyrý naýqanynyń qorytyndylary, qysqy oqytý maýsymyna daıyndyq jáne áskerı tehnıkalardy qysqy rejımge kóshirý jóninde málimet berdi. Budan bólek áýe qorǵanysy men áskerı-teńiz kúshterin damytý, Uly Otan soǵysyndaǵy Jeńistiń 75 jyldyǵyna arnalǵan áskerı sherýge daıyndyq, sondaı-aq, áskerı qyzmetshilerdi áleýmettik turǵydan qorǵaý máseleleri qozǵaldy.

Kezdesý sońynda Qasym-Jomart Toqaev elimizdiń Qarýly Kúshterin qazirgi zaman talabyna saı jasaqtaýǵa qatysty birqatar naqty tapsyrma berdi.

Joǵary qaraı