Aýa raıy
Astana -11 °S
Almaty -6 °S
valıýta baǵamy
USD 421.58
EUR 496.83
RUB 5.53
CNY 62.20

Armanǵa adaldyq: Ulttyq kompanııadaǵy qyzmetin tastap, aýylǵa ketip, irimshik jasaýda

2020 jyldyń 21 qarasha 2020 09:15

NUR-SULTAN. QazAqparat – 34 jastaǵy Aleksandr Shevchenko shetelde tájirıbesin shyńdap, elordadaǵy ulttyq kompanııada jetekshi ınjener bolyp jumys istegen. Otbasyn quryp, baspanaly da boldy. Ony qyzmettik ósine de múmkindikter az emes sekildi edi. Biraq ol jarqyn bolashaǵyn irimshik jasaýmen baılanystyrýdy qalapty. Osylaısha Nur-Sultan qalasynan 110 shaqyrymdyq jerdegi Torǵaı aýylyna kóship, irimshik jasaı bastaǵan... «QazAqparat» tilshisi qaladaǵy úıin armanyna aıyrbastaǵan kásipker – Aleksandrdan suhbat aldy.

Aleksandrdyń negizgi mamandyǵy – baılanys júıesi ınjeneri. 2008 jyly M. Tynyshbaev atyndaǵy Qazaq kólik jáne kommýnıkatsııalar akademııasyn támamdaǵan ol ulttyq spýtnıktiń teledıdar operatory bolyp jumysqa ornalasady.

«Men Aqmola oblysy, Torǵaı aýylynda dúnıege keldim. M. Tynyshbaev atyndaǵy Qazaq kólik jáne kommýnıkatsııalar akademııasynyń túlegimin. Ulttyq kompanııaǵa irikteý arqyly jumysqa ornalasyp, Ulybrıtanııaǵa tájirıbemdi shyńdaý úshin baryp keldim. Shynymdy aıtsam, qalanyń qaýyrt tirligi, aı saıyn ıpoteka tóleý meni sharshata bastady. Bolashaqta keńseden shyqpaıtyn qyzmetker bolyp qalǵym kelmedi», - deıdi ol.




Ol jubaıymen aqyldasyp, Torǵaı aýylyna kóshýge sheshim qabyldaıdy.

«Bastapqyda paketti sút satý týraly oılandyq. Kúnde ınternette otyryp, jańa ıdeıa izdedik. Osylaısha irimshik jasaý týraly toqtamǵa keldik. Aýylǵa kóshpes buryn jubaıym ekeýmiz irimshik jasaýdyń tehnologııasyn zerttep, as úıde irimshik qaınatyp kórdik. Іrimshiktiń túr-túrin az kólemde jasaı bastadyq. Tońazytqyshymyz irimshikke tola bastady. Tipti, ony satyp alýshylar da shyǵa bastady», - deıdi Aleksandr.







Aleksandr qaladaǵy úıin satyp, aýyldaǵy ata-anasynyń qasyna kóship barady.

«Páterdi satqannan túsken qarjyǵa eki temir konteıner satyp alyp, ony irimshik saqtaýǵa bolatyn orynǵa aınaldyrdym. Aqsha únemdeý úshin buryn qoldanylǵan qurylǵylardy satyp alyp, óz yńǵaıyma qaraı jóndedim. Mamandyǵym ınjener bolǵany maǵan kóp kómektesti», - deıdi Aleksandr.

Ol basqa emes, dál osy salany tańdaǵan sebebi – básekelesterdiń azdyǵymen túsindiredi.

«Bul salada bizde básekeles az bolatynyn bildik. 2018 jyldyń naýryz aıynda irimshik jasaıtyn óndiris ornyn iske qostyq, biraq isimiz bastalmaı jatyp súrindik. Bir aı boıy jasaǵan irimshigimiz keýip ketip, jeýge jaramsyz bolyp qaldy. Boıymdy ashý-yza kernedi. Munyń bári irimshik jasaýǵa qatysty bilimniń tereń bolmaǵandyǵynan edi», - deıdi ol.

Osyndaı jaǵdaıǵa tap bolǵanda oǵan bul isti kesh bolmaı turǵanda toqtata salý kerektigi týraly keńes bergender kóp bolǵan.

«Aýyldastarym «Іrimshik jasaý, saqtaý, satý ońaı emes. Basqa ispen shuǵyldanǵanyń jón-aý» degen keńes berdi, biraq bastaǵan isti toqtatqyń kelmeıdi. Namysqa tyrysyp, jumysymdy jalǵastyra berdim. Meniń tańdaǵan jolymdy qoldaý eshbir jaqynyma ońaı bolǵan joq. Ol kezde qarajatymyz óte az bolatyn, tek sút satyp alýǵa ǵana shamamyz keletin. Іrimshik jasaýdan bólek suranysty arttyryp, irimshik jasaýǵa qajetti qospalardy tabýym kerek. Sondaı-aq, bizdiń elde sút ónimderine qatysty tehnologtar az. Bizdiń tehnolog – jubaıym. Negizi ol da mamandyǵy boıynsha ınjener jáne sol salada biraz jyl jumys istegen. Ol meniń bastamamdy qoldap qana qoıǵan joq, is júzinde kómektesti. Іrimshik jasaýǵa qatysty ártúrli onlaın kýrstardan ótti. Bıyl Reseıge baryp, biliktiligin arttyryp kelmek edi. Koronavırýs indeti bastalyp ketkendikten jolǵa shyǵa almaı qaldy», - deıdi kásipker.




Qazirgi ýaqytta ol óndiris ornyn keńeıtip, qosymsha tseh salýdy qolǵa alyp jatyr.

«Іrimshik satýdan túsken qarajatty osy óndiris ornyn keńeıtýge, jańa qurylǵy satyp alýǵa jumsap jatyrmyz. Kásipkerlerdi qoldaýǵa arnalǵan memlekettik baǵdarlamalarǵa qatysyp kórdik, biraq grant utyp almadyq. Ne sebepti men qolǵa alǵan is memlekettiń qoldaýyna laıyqty emes ekenin de túsinbeımin. Halyqty tabıǵı, paıdaly ónimmen qamtamasyz etýdi nege qoldap jibermeske? Degenmen, moıymaımyn, jasymaımyn, bastaǵan isimdi jalǵastyra beremin», - deıdi ol.

Ol irimshik jasaý ońaı is emes ekendigin aıtty.

«Іrimshik jasaý – ońaı emes. Іrimshikti aıyna bir ret irimshik jasaý men kúndelikti jasaýdyń aıyrmashylyǵy jer men kókteı. Biz motsarella, brynza, kachotta, halýmı, feta, sýlýngýnı, býrrata, kachokavello, maasdam, gaýdakamamber jáne basqa da irimshik túrlerin jasaımyz. Men úshin ár mınýt, ár sekýndym baǵaly, sebebi irimshiktiń oıdaǵydaı shyǵýyna ár mınýt, ár sekýnd áser etedi. Tańǵy jetide Torǵaıdan 30 shaqyrymdyq jerde ornalasqan aýylǵa sút alýǵa baramyz. 150 lıtr sút satyp alam da, keri qaıtamyn. Sóıtip keshke deıin ýaqyt qalaı ótip ketkenin bilmeı qalasyń. Mysaly, kachotta irimshigin jasaǵan kezde sútti arnaıy ydysqa quıyp, 64 gradýsta 20 mınýt qaınatamyz. 64 emes, 63 nemese 65 gradýs bolyp qalsa – qalaǵan ónimińdi ala almaısyń. Sonymen qatar, 20 mınýt qaınatý kerek bolsa – demek 20 mınýt qaınatý kerek, 1 mınýt erte nemese kesh alsań – jaramsyz bolyp qalady. Bul – bir ǵana mysal, irimshik jasaýdyń odan basqa qanshama mashaqaty bar», - deıdi kásipker.







Qazirgi ýaqytta ol ónimderin elordadaǵy 3 dúkenge aparady.

«Ázirge bizdiń shama-sharqymyz 3 dúkenmen jumys isteýge ǵana jetedi, biraq olar úzdiksiz alyp turady. Ózimizdiń turaqty tutynýshylarymyz da bar. Biz jasaǵan irimshiktiń dámin tatqan adamdar dúkenge bizdiń irimshiktiń kelýin asyǵa kútip, arnaıy kelip alyp ketedi», - deıdi ol.

Sonymen qatar, Aleksandr karantın kezinde qalaǵa irimshik jetkizip qana qoımaı, aýyldastarynyń qalaǵan zatyp aýylǵa tegin túrde jetkizip berýmen de aınalysqan.

«Bıyl bárimiz úshin ońaı jyl bolǵan joq. Karantın bolǵandyqtan aýyldastarym qalaǵa qatynaı almaı qaldy. Men irimshik satatyndyqtan, qalaǵa kirip-shyǵýǵa ruqsat qaǵazym boldy. Kóligime irimshikti tıep alyp ketemin de, qaıtar kezde aýyldastardyń tapsyrǵan zattaryn kóligime tıep alyp kelemin. Ol azyq-túlik, kerek-jaraq, kólikti jóndeýge qatysty qural-saımandar bolýy múmkin. Osyndaı qıyn-qystaý kezeńde qol ushyn sozý múmkindigi bolǵannyń ózi – bir baqyt», - deıdi ol.




Aleksandr Shevchenko osylaı óz isin qolǵa alyp, kásibin dóńgeletkisi keletinderge aqyl-keńes aıtty.

«Eń bastysy – qandaı isti bastasań da seni qoldaıtyn adamnyń bolýy. Jubaıym meniń keńsede otyra beretin adamdar qatarynan emes ekenimdi túsinip, bastamamdy qoldady. Oǵan meniń sheshimimmen kelisý ońaı bolǵan joq, biraq men úshin táýekel etti. Sondaı-aq, bastapqy birneshe jylda tabysqa kenelmeıtinińizdi esten shyǵarmaýyńyz kerek. Bastapqy jyldardaǵy tabys isti aınaldyrýǵa, kerek-jaraqty alýǵa ketedi. Mundaı kezde nesıe alýǵa kóp senim artpaý kerek, sebebi oqys jaǵdaı bola qalsa – aı saıyn nesıe jabý ońaı emes. Biz bul isti satý úshin elordadaǵy úıimizdi sattyq. Osyndaı táýekelge bara alasyz ba nemese bastaıtyn isińiz osyndaı táýekelge barýǵa laıyqty ma – osy jaǵyn jaqsylap saralap alý kerek. Memlekettik baǵdarlamalar da qoldaý bildirmeýi múmkin, sol sebepti qandaıda bir isti qolǵ,a alar kezde tek óz kúshińiz ben múmkindigińizge ǵana senim artyńyz», - deıdi ol.





Joǵary qaraı