Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Altaıdaǵy shopandar týrısterdi qoı baǵýǵa shaqyrdy - Sheteldegi qazaq tildi BAQ-qa sholý

2021 jyldyń 17 qazan 2021 12:20

NUR-SULTAN. QazAqparat - «QazAqparat» HAA sheteldegi qazaq tilinde taraıtyn aqparat kózderine aptalyq sholýyn usynady.

Altaıdaǵy shopandar týrısterdi qoı baǵýǵa shaqyrdy - «Aǵajaı-Altaı aqparat» saıty




Qytaıdyń Altaı aımaǵynyń Býryltoǵaı aýdanynda «Altaıda meniń qoıym bar» atty týrısterdi Altaı jerine kelip «qoı baǵýǵa» shaqyrǵan erekshe jobanyń tusaýkeser rásimi ótti, dep jazady kazakh.altxw.com saıty.

Atalǵan BAQ-tyń jazýynsha, bul erekshe joba Býryltoǵaı aýdanynda kóktem men kúz aılarynda uıymdastyrylyp, týrıster úshin «Otbasylyq ferma» daıyndap beredi. Osy baǵdarlamanyń jospary boıynsha qyzyǵýshylyq tanytqan adamdar qozy satyp alyp, ony jergilikti shopandardyń kómegimen «onlaıyn baǵyp» ósirip, baqylap otyrady. Tipten olar Altaıdyń tamasha tabıǵatyna demalýǵa kelip, qoılaryn ózderi baǵyp, jaıýyna, qoıshylar ómirin bastan keshirip kórýine de múmkindik bar. Bul erekshe bastamany mádenı qundylyqtardy nasıhattap júrgen Shynjańdaǵy belgili kompanııa usynǵan. Al osy iske atsalysyp jatqan shopandar Býryltoǵaı aýdanynyń Shybaroı aýylynyń turǵyndary. Qandastarymyz meken etken bul aýylda 10 myń bas qoı bar. Jergilikti bılik osy joba arqyly aımaqqa týrısterdi tartyp, aýyl turǵyndarynyń kirisin arttyrmaq.




Kóshpendiler oıyndary bıyl Túrkııada ótedi - TRT




Dúnıejúzilik kóshpendiler oıyndary bıyl Túrkııanyń Iznık qalasynda uıymdastyrylady, dep habarlaıdy Túrkııa Radıo Televızııa portaly.

Atalǵan BAQ- tyń jazýynsha, I-shi Dúnıejúzilik kóshpendiler oıyndary Qyrǵyzstan úkimetiniń usynysymen Túrki Keńesiniń ekinshi sammıti aıasynda ótkizilgen. Bul oıyn tek túrkitektes halyqtar úshin ǵana emes, álemniń barlyq kóshpeli halyqtarynyń rýhanı sanasy men tarıhı jadyn jańǵyrtýǵa baǵyttalǵan.

«Dúnıejúzilik etnosport konfederatsııasynyń qoldaýymen ótkiziletin Dúnıejúzilik kóshpendiler oıyny osy kúnge deıin 3 ret Qyrǵyzstanda bolyp ótti. Birinshisi 2014 jyldyń 9-14 qyrkúıek kúnderi arasynda Ystyqkól aımaǵynda ótti. Jarysqa 19 elden sportshylar qatysty. Ekinshisi 2016 jyldyń 3-8 qyrkúıek kúnderi arasynda «Kúsh birligi» degen uranmen ótti. Bul jolǵy oıyndarda 53 elden kelgen sportshylar baǵyn synady. 2018 jyly ótken úshinshi Dúnıejúzilik kóshpendiler oıyndaryna 82 elden kelgen 2000 myńǵa jýyq sportshy qatysty. Tórtinshi Dúnıejúzilik kóshpendiler oıyndaryn Túrkııada uıymdastyrý týraly sheshim qabyldanǵan bolatyn, alaıda koronavırýstyń órshýine baılanysty oıyndar keıinge qaldyryldy. Bıyl Dúnıejúzilik kóshpendiler oıyndarynyń Túrkııanyń Iznık qalasynda uıymdastyrylýy josparlanyp otyr», - dep jazady TRT.

QR Prezıdenti Mońǵolııanyń Syrtqy qatynastar mınıstri Batmónhıın Battsetsegti qabyldady - KAZNEWS




Qazaqstan Respýblıkasynyń Prezıdenti Qasym-Jomart Toqaev Mońǵolııanyń Syrtqy qatynastar mınıstri Batmónhıın Battsetsegti qabyldady, dep jazady Mońǵolııanyń Kaznews aqparattyq portaly.

Atalǵan BAQ-tyń jazýynsha, kezdesý barysynda Qazaqstan Respýblıkasynyń Memleket basshysy Qasym-Jomart Toqaev qarqyndy damyp kele jatqan qazaq-mońǵol qarym-qatynastaryna toqtaldy.

«Mońǵolııa – bizdiń senimdi ári strategııalyq seriktesimiz. Memleketterimizdi ortaq tarıhymyz biriktiredi. Mońǵol halqyna, Sizdiń memleketińizge degen qurmetimiz erekshe. Sizder bizdiń halyqaralyq bastamalarymyzǵa túsinistik tanytyp, únemi qoldaý kórsetesizder. Sondaı-aq halyqaralyq alańdarda birge belsendi jumys istep kelemiz. Osy yntymaqtastyǵymyzdy odan ári arttyryp, is júzinde nyǵaıta berýimiz qajet dep sanaımyn. Bul, eń aldymen, saýda-ekonomıkalyq yqpaldastyqqa qatysty. Biz kólik logıstıkasy salasyn pysyqtaı túsýimiz kerek», – dedi QR Prezıdenti.




Memleket basshysy qalyptasqan ekijaqty yntymaqtastyqtyń áleýetin barynsha paıdalanýǵa shaqyrdy.

«Osy sátti paıdalana otyryp, etnıkalyq qazaqtarǵa kórsetilip otyrǵan qurmeti pen qamqorlyǵy úshin Sizdiń eldiń basshylyǵyna jáne mońǵol halqyna rızashylyǵymdy bildiremin. Mońǵolııa qazaqtarynyń tilin, mádenıeti men dástúrin saqtaý máseleleri boıynsha tyǵyz yntymaqtastyǵymyz jalǵasa beredi dep úmittenemin. Bul – Sizdiń memleketińiz júrgizip otyrǵan ulttyq saıasattyń nátıjesi. Muny zor rızashylyqpen atap ótkim keledi», – dedi Qasym-Jomart Toqaev.

Kezdesý sońynda QR Memleket basshysy Qasym-Jomart Toqaev Mońǵolııa Prezıdenti Ýhnaagıın Húrelsúhti Qazaqstan Respýblıkasyna resmı saparmen kelýge shaqyratynyn aıtty. Qazaqstan Respýblıkasynyń Memleket basshysy atalǵan resmı sapar Qazaqstan men Mońǵolııa arasyndaǵy yntymaqtastyqtyń damýyna tyń serpin beredi dep sanaıdy.


Qazaqstan Elshisi Jyzaq oblysyna jumys saparymen bardy - «ÓzA» aqparattyq agenttigi




2021 jyldyń 9-10 qazan kúnderi Qazaqstan Respýblıkasynyń Ózbekstan Respýblıkasyndaǵy Tótenshe jáne Ókiletti Elshisi D.Satybaldy jumys saparymen Jyzaq oblysynda boldy, dep jazady Ózbekstannyń «ÓzA» memlekettik aqparattyq agenttigi.

«Sapar barysynda D.Satybaldy Zemın aýdanyndaǵy «Dýoba» azamattarynyń aýyldyq jıyny turǵyndary úshin jasalǵan jaǵdaı, sondaı-aq aýyldyq dárigerlik pýnkt pen tigin sheberhanasynyń qyzmetimen tanysty. Elshi sonymen qatar oblys ortalyǵynda ornalasqan jańa IT –parkpen tanysty. Sondaı aq, Elshi «Abat Mahalla» baǵdarlamasyna sáıkes, memlekettiń áleýmettik jáne óndiristik, onyń ishinde aýyl sharýashylyǵy salasyndaǵy ınfraqurylymdy damytyp, jastardy jumyspen qamtý boıynsha júrgizip otyrǵan jumystarymen de tanysty. Óz kezeginde, Qazaqstan Elshisi D.Satybaldy oblystaǵy №29 qaırymdylyq úıinde bolyp, ortalyq dırektoryna Qazaqstan Táýelsizdiginiń 30 jyldyǵyna oraı ózbek tiline aýdarylǵan Abaı Qunanbaevtyń «Qara sózderi» kitabyn tabys etti», - dep jazady «ÓzA» aqparattyq agenttigi.





Ujymdyq qaýipsizdik týraly shart uıymyna múshe elder Aýǵanstannyń Tájikstanmen shekarasynda áskerı jattyǵý ótkizedi - Fars




«AVA aqparat agenttiginiń habarlaýynsha, Ujymdyq qaýipsizdik týraly shart uıymyna múshe elder 22-23 qazanda Tájikstannyń Aýǵanstanmen shekarasynda eki kúndik áskerı jattyǵý ótkizýdi josparlap otyr. Bul jattyǵýǵa CSTO-ǵa múshe Tájikstan, Qyrǵyzstan, Qazaqstan, Armenııa jáne Belarýs elderiniń kúshteri qatysady. Tájikstan Aýǵanstanmen eń uzaq shekaraǵa ıe», - dep habarlaıdy Irannyń Parstoday aqparat agenttigi.

Termizde Ózbekstan – Aýǵanstan kelissózder júrgizýde - «ÓzA» aqparattyq agenttigi




16 qazanda Aýǵanstan ýaqytsha úkimeti basshysynyń orynbasary mindetin atqarýshy Abdýl Salam Hanafı bastaǵan delegatsııa Termizge keldi, dep jazady Ózbekstannyń «ÓzA» memlekettik aqparattyq agenttigi.

«Kezdesýde Ózbekstan delegatsııasyn Premer-mınıstrdiń orynbasary - Investıtsııalar jáne syrtqy saýda mınıstri Sardor Ýmýrzakov basqarýda. Bul kelissózder Ózbekstan Syrtqy ister mınıstri Abdýlazız Kamılovtyń 2021 jyldyń 7 qazanynda Aýǵanstanǵa jumys sapary kezinde qol jetkizilgen ýaǵdalastyqtardy iske asyrý aıasynda ótedi», - dep jazady «ÓzA» aqparattyq agenttigi.



Avtor Baqytjol Kákesh
Basty sózder: BAQ, Qandastar,
Joǵary qaraı