Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

«Alpamys» operasy jyl premerasy atandy

2021 jyldyń 6 jeltoqsan 2021 09:25

NUR-SULTAN. QazAqparat - Qazaqstan Táýelsizdiginiń 30 jyldyǵyna oraılastyrylǵan Erkeǵalı Rahmadıevtiń «Alpamys» ulttyq operasynyń premerasy mýzykalyq qaýymdastyqtyń erekshe qyzyǵýshylyǵyn týǵyzdy, dep habarlaıdy QazAqparat.

Sheteldik jáne otandyq teatr synshylary 3 jáne 4 jeltoqsanda Mádenıet jáne sport mınıstrliginiń qoldaýymen «Astana Opera» sahnasynda usynylǵan operalyq klassıka injý-marjanyn joǵary baǵalady.

Qoıylym toby spektaklge kórermen aýdıtorııasynyń zamanaýı qajettilikterimen úndes jańa dem berdi.

Ulttyq klassıkanyń múldem kútpegen fentezı stılinde usynylýy qazaqstandyq opera óneriniń tutastaı damý tarıhyndaǵy alǵashqy tájirıbe bolsa kerek.

Qoıylym óte kórinisti, tehnologııalyq bolyp shyqqan, sondyqtan kórermen qaýym ony jandy oryndaýdaǵy tolyqmetrajdy fılm retinde qabyldady.

Bul rette proektsııalar boıynsha ıtalııalyq dızaıner Serdjıo Metallıdiń jumysy orasan zor ról atqardy, onyń sheberliginiń arqasynda sahna tórinde ot jalyndady, qustar ushty, dala tabıǵaty men han saraıynyń keremet kórinisteri jandana tústi.

Sofıa Tasmaǵambetova men Pavel Dragýnovtyń dekoratsııalary men kostıýmderi stıli jaǵynan «Astana Opera» sahnasynda sýretshilermen júzege asyrylǵan aldyńǵy 7 jumystan ózgeshelendi.

Olar opera-fentezı úshin qyzyqty sheshimder tapty jáne spektaklge kúrdeli dekoratsııa elementterin engizdi, olardyń ishinde óziniń túrlenýimen áser etetin kópfýnktsııaly kenep bar.

Tórt júz túrli kostıým san alýan maǵyna berdi – mine, Taıshyq hannyń jaý taıpasy, ol kúńgirt túste berilgen, al mynaý ulttyq naqyshty jetkizetin ulttyq kostıýmder.

Jalpy alǵanda, tutastaı qoıylym nyshandarǵa toly, solardyń eń bastysy – Alpamysqa jaýdy jeńsin dep Jer ana usynǵan semser.

Káýken Kenjetaevtyń lıbrettosynda qaharmandyq epızodtardyń kóptigine qaramastan, lırıkalyq taqyryptar shaıqastardan, basqynshylyqtardan ústem boldy jáne ıÝ.Aleksandrovtyń rejısserlik nusqasyndaǵy bas keıipkerlerdiń mahabbat kórinisteri súısindirdi.




Bul jaǵynan Alpamys, Gúlbarshyn, Qaragózdiń dýetteri keremet shyqty.

Atalmysh shyǵarmadaǵy negizgi keıipker – Jer ana – áýlıeliktiń nyshany, ol qoıylymǵa aýqymdylyq ústedi, osy arqyly munyń turmystyq opera emestigi uǵynyqty boldy.

Batyrdyń halyqqa baqyt ákelip, jarqyn bolashaqqa degen úmit otyn jandyratyn erlikterine baılanysty mıfologııa elementteri baǵyndyrar bıik belesteri bar búgingi shynaıy ómirmen belgili bir dárejede ushtasty.

Rejısserdiń taǵy bir tabysy – oqıǵa jelisiniń aqyn-jyraý aýzynan baıandalýy, ony Erlan Rysqalı oryndady.

Qoıýshy rejısser óz rólderine jan-tánimen berilip, boıyndaǵy darynynyń jańa qyrlaryn pash etken oryndaýshylarmen orasan zor jumys istedi.

Alpamys partııasyn Erjan Saıpov pen Rasýl Jarmaǵambetov tamasha somdap shyqty.

Ánshilerdiń jas, tartymdy energııasy kórermen zalyna taraldy, ártister ózderiniń vokaldyq ári akterlik mindetterin minsiz atqardy.

Bul spektaklde ıÝrıı Aleksandrov tórt beınemen áıelder taqyrybyn keńinen ashty. Qaragóz – keremet soprano Saltanat Ahmetova men bolashaǵy jarqyn ánshi Ásem Sembına jaýapsyz mahabbat úshin erlikke bel býdy.

Ánshiler óz keıipkerin Shekspır dramasyna tán pash etti. Gúlbarshyn beınesin sahnada Aıgúl Nııazova men Jamılıa Jarqymbaeva somdady, árbir ánshiniń ózindik mahabbat tarıhy boldy, ártister taǵdyrdyń barlyq qıynshylyǵy men aýyrtpalyǵyn bastarynan ótkerdi.

Sıqyrǵa toly úshinshi áıel keıipker – Mystandy – Bıbigúl Januzaq pen Gúljanat Sapaqova mánerli jetkizdi. Jer ana – Saltanat Muratbekova, Tatıana Vıtsınskaıa – osy bir qıyn róldi alty metrlik bıiktikte turyp keremet oryndap shyqty.

Jaǵymsyz keıipker Taıshyq handy Janat Shybyqbaev, Shyńǵys Rasylhan óte shynaıy somdady, zaldaǵy kórermen onyń qatygezdigine birden sendi.

Sondaı-aq Keıqýat – Álıhan Zeınolla, Abylaı Beken, Qaraman – Beıimbet Tańaryqov, Ultan – Ramzat Balakıshıev te óz partııalaryn tamasha oryndady.

Partıtýra boıynsha ǵalamat jumys jasaǵan qoıýshy dırıjer Abzal Muhıtdınniń jetekshiligimen «Astana Opera» sımfonııalyq orkestriniń oryndaýynda naǵyz teatr kompozıtory Erkeǵalı Rahmadıevtiń qosalqy mátinderi men keıbir erekshelikterine qanyq tańdaýly mýzykasy jańa boıaýlarǵa ıe boldy.

Bul spektaklde hor men balettiń qatysýymen ótetin kópshilik kórinister jańashyl ári serpindi kórindi, ár qımyldy qoıýshylar, olardyń qatarynda bas hormeıster Erjan Dáýitov, qoıýshy baletmeısterler Tursynbek Nurqalıev pen Ǵalııa Bóribaeva jaqsy oılastyrǵan.

Sirá, kompozıtordyń qyzy Naılıa Rahmadıeva keńesshi bolǵandyqtan, operanyń mýzykalyq bóligi eń joǵary deńgeıde usynyldy.

Alpamys tutqynnan bosap shyǵyp, jaýyz handy taqtan taıdyratyn jáne jaqsylyq jeńiske jetetin myqty, saýatty qurylǵan fınal shyn máninde saltanatty boldy.

Qoıylym bir demde ótti, teatr súıer qaýymnyń pikirinshe, ol jyl premerasy dep tanyldy.

















Basty sózder: Nur-Sultan, Óner, Mádenıet,
Joǵary qaraı