Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Almatynyń Naýryzbaı aýdanynda zamanaýı órt sóndirý bólimi ashyldy

2021 jyldyń 19 qyrkúıek 2021 15:05

ALMATY. QazAqparat - Órt qaýipsizdigi men azamattyq qorǵanysty qamtamasyz etý sharalary aıasynda «Aqjar» shaǵynaýdanynda 1,5 jyldyń ishinde órt sóndirý deposy salyndy, dep habarlaıdy QazAqparat tilshisi.

Qala kúni merekesine oraı Naýryzbaı aýdanynda órt sóndirý bólimi ashyldy. Órt sóndirý bólimi aýdannyń 159 myńnan astam turǵynyna qyzmet kórsetetin bolady.




Almaty qalasynyń ákimi Baqytjan Saǵyntaev órt sóndirýshilerdi bólimsheniń ashylýymen quttyqtap, qyzmetteri úshin alǵysyn bildirdi. Jańa órt sóndirý beketi oqıǵa ornyna barý ýaqytyn qysqartady jáne órt qaýipsizdiginiń tıimdiligin arttyrady.

Deponyń ashylý saltanatyna QR Tótenshe jaǵdaılar vıtse-mınıstri Kúldikov Marat Muhametqalıuly, Almaty qalasynyń TJD basshylary men azamattyq qorǵaý ardagerleri qatysty.




2014 jyly qurylǵan Naýryzbaı aýdanyna Jaılaý, Qaraǵaıly, Quramys, Rahat, Qarǵaly, Taýsamaly, Aqjar, Tastybulaq, Taýjoly, Shuǵyla, Altyn Alash, Qalqaman-1, 2, 3 shaǵynaýdandary kiredi. Jalpy turǵyndar sany – 159 115 adam.

Qalaǵa qosylǵan aýmaqta órt sóndirý beketi bolmady, sondyqtan Aqjar shaǵynaýdanynda órt sóndirý posty uıymdastyryldy.

2015 jyldan beri bul bólimshe 700-den astam shaqyrtýlarǵa bardy.

Eki qabatty depo ǵımaratynyń qurylysy 1,5 jyldan da az ýaqyt ishinde aıaqtaldy.

Órt sóndirý bólimi jalpy alańy 3,2 myń sharshy metrge jýyq alty shaqyrtýǵa eseptelgen.

Garnızon qyzmetkerlerine jataqhana qarastyrylǵan. Sondaı-aq, qala ákimi Baqytjan Saǵyntaev qyzmettik avto kóliktiń kiltin tabys etti.




Avtotsısternalar órt sóndirý bóliminiń qoraptaryna ornalastyrylady.

Aýdannyń belsendi damýyn eskere otyryp, órtti sóndirýge arnalǵan qural-jabdyqtarmen birge, bólim bıik úılerge arnalǵan arnaıy kóliktermen jabdyqtalatyn bolady.

Búginde Almaty qalasynyń órtten qaýipsizdigin 17 bólimshe qamtamasyz etedi.

Órt sóndirý qyzmeti 157 birliktegi órt sóndiretin avtotehnıkamen jasaqtalǵan, kún saıyn táýliktik kezekshilikke 210 adam shyǵady.

Bıyl jergilikti bıýdjet esebinen garnızon taǵy 44 birlik tehnıkamen tolyqtyrylady.

Qazirgi ýaqytta órt qaýipsizdigin kúsheıtý jáne tótenshe jaǵdaılarǵa der kezinde den qoıý maqsatynda Alataý aýdanynda órt sóndirý beketiniń qurylysy aıaqtalýda.

Bostandyq aýdanynyń Nur-Alataý shaǵynaýdanyndaǵy 4 shaqyrtýǵa bara alatyn órt sóndirý beketiniń qurylysy júrgizilýde.


Joǵary qaraı