Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Almatylyq dárigerler denesiniń 40 paıyzyn kúıik shalǵan er adamdy aman alyp qaldy

2021 jyldyń 7 jeltoqsan 2021 03:30

ALMATY. QazAqparat- Almatylyq dárigerler denesin40 paıyzyn kúıik shalǵan er adamdy aman alyp qaldy, dep habarlaıdy QazAqparat tilshisi.

Oqıǵa bıylǵy jyldyń qyrkúıek aıynda boldy. Kóliginiń janarmaı súzgisin óz betinshe aýystyryp jatqan er adamnyń ústine benzın tógilip, órt shyǵyp, ony kúıik shaldy.

«Bul 26 qyrkúıekte boldy. Men kólikti jóndep jatqanda, aıaǵym janyp ketti. Men alasuryp aýlada júgirdim, jerde domalaýǵa tyrystym, biraq benzın ústimde jalyndap jatty. Men jalyndy sóndire almadym», - deıdi Rınat Ilmıev.

Eldegi eń iri kúıik ortalyǵy № 4 qalalyq klınıkalyq aýrýhanada ornalasqan.

Aýrýhana baspasóz qyzmetiniń málimetinshe, er adam klınıkanyń qabyldaý bólimine jetkizilip, birden anestezıologııa, reanımatsııa, qarqyndy terapııa bólimshesi (ARQTB) jatqyzyldy.

Ádette, eń aýyr zardap shekkender – qatty kúıikpen, kúıiktik shokpen, tynys joldarynyń zaqymdalýymen, qan ketýmen, deneniń ómirlik mańyzdy fýnktsııalarynyń buzylýymen – reanımatsııa bólimine jatqyzylady. ARQTB reanımatsııalyq is-sharalardy, qarqyndy terapııany jáne baqylaýdy júrgizý úshin barlyq qajettiliktermen jabdyqtalǵan.

«Naýqas aýyr halde tústi. Alǵashqy medıtsınalyq kómek kórsetilgennen keıin, klınıkalyq-zerthanalyq jáne aspaptyq tekserýler, mýltıdıstsıplınarlyq tekserýler júrgizilgennen keıin oń bilektiń, aldyńǵy ish qabyrǵasynyń, aıaq-qolynyń, bókseniń termııalyq kúıigi s=40%/I-II-IIIa-ІІІb dárejesi dıagnozy qoıyldy. Septıkotoksemııa satysyndaǵy kúıik aýrýy. Dene betiniń 40% termııalyq kúıigi. Qajetti medıtsınalyq kómek kórsetildi», - dedi emdeýshi dáriger Dıas Dáýletbaev.

Aýrýhana qyzmetkerleri naýqastyń ómiri úshin 2,5 aı kúresti. Quramynda kombýstıologtar men reanımatologtar bar joǵary bilikti dárigerler toby bes hırýrgııalyq operatsııa jasady, olardyń úsheýi teri transplantatsııasy boıynsha. Búgin tańda er adam jaǵdaıy jaqsaryp, aýrýhanadan shyǵaryldy.

«70 kún boıy bizdiń jetekshi kombýstıologtar men reanımatologtar osy patsıentti emdeýmen aınalysty. Joǵary bilikti mamandar men zamanaýı jabdyqtar tereń kúıikterdi erte hırýrgııalyq emdeý tehnologııasyn belsendi qoldanýǵa múmkindik beredi. Aýqymdy kúıik jaralary bar patsıentterge arnalǵan «Redactron» aeroterapııalyq flıýıdızatsııalaıtyn, kúıikke qarsy kereýetter dep atalatyn qondyrǵylary iske qosyldy. Bul ortasha kórsetkishtermen salystyrǵanda emdeý merzimin 2 ese qysqartýǵa múmkindik beredi», - dep naqtylady №4 Qalalyq klınıkalyq aýrýhananyń bas dárigeri Saǵı Beısenbekov.

«Meni 2,5 aı emdedi, Aýrýhana qyzmetkerlerine ómirimdi saqtap qalǵany úshin shyn júrekten alǵys aıtamyn. Úıde meni jubaıym men úsh ulym kútip otyr, búgin otbasyma oralamyn», - dep bólisti Rınat Ilmıev.

Avtor Alma Muqanova
Basty sózder: Oqıǵa, Almaty, Medıtsına,
Joǵary qaraı