Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Almatydaǵy revmatologııa ortalyǵy 250 orynǵa deıin keńeıtilmek

2021 jyldyń 16 shilde 2021 10:42

ALMATY. QazAqparat- Almaty ákimi Baqytjan Saǵyntaev qaladaǵy emhanalar men mektepterdi modernızatsııalaý máselelerin qarady jáne qala aýmaqtaryn abattandyrýmen tanysty, dep habarlaıdy QazAqparat tilshisi.

Megapolıs ákimi Almaly aýdanyndaǵy 65 orynǵa eseptelgen qalalyq revmatologııalyq ortalyqta boldy. Medıtsına mekemesiniń bas dárigeri A. Kúlembaevanyń aıtýynsha, Almatyda revmatoıdty dertke shaldyqqan 11 myńǵa jýyq adam bar.

Sondyqtan olarǵa ýaqtyly medıtsınalyq kómek kórsetý úshin medıtsınalyq mekemeni keńeıtý qajet.

Jaǵdaıdy zerttegen Baqytjan Saǵyntaev tósek-oryn sanyn 200-250-ge deıin arttyrý úshin ortalyqtyń jańa korpýsyn salý jobasyn ázirleýdi tapsyrdy.

Al, ardagerlerge arnalǵan aýysymyna 500-ge deıin kelýshini qabyldaıtyn qalalyq emhana ǵımaraty kúrdeli jóndeýdi qajet etedi. Emhanaǵa 30 myńnan astam adam bekitilgen.

1955 jyly salynǵan ǵımarat 10 jyl buryn jóndelgen.

Qala ákiminiń tapsyrmasy boıynsha emhanany seısmıkalyq nyǵaıtý jáne kúrdeli jóndeýden ótkizý múmkindigi qarastyrylatyn bolady.

Baqytjan Saǵyntaev aýdannyń bilim ınfraqurylymynyń damýymen tanysty.

Oqýshy ornynyń tapshylyǵyn azaıtý maqsatynda №34 mektep-gımnazııasynyń 600 oryndy jańa korpýsy salynyp jatyr.

Sonymen qatar, Qabanbaı batyr kóshesiniń boıynda jeke ınvestor buryn qurylysy toqtaǵan nysan negizinde 856 oryndy daryndy balalarǵa arnalǵan mekteptiń qurylysyn bastady.

Balalardyń deneshynyqtyrýyn damytý úshin MJÁ aıasynda №128 mektep aýmaǵynda kópfýnktsıonaldy sport kesheni salynýda.

Barlyǵy 11 sport kesheni salynady, al mektep janyndaǵy qoldanystaǵy 33 sport alańy modernızatsııalanady.

Sondaı-aq, Baqytjan Saǵyntaev DEPO Evolution Park-tiń qurylys barysymen tanysty, munda kreatıvti ındýstrııa jobalaryn iske asyrýǵa arnalǵan alań jasalatyn bolady.

Maqataev skverinde qala ákimine «Býkkrossıng» kóshpeli kitaphana jobasy tanystyryldy.

Munda árkim kitap ala alady, ózinikin qaldyrady nemese qalaǵan basylymyn oqýǵa alady. Aýdannyń saıabaqtary men skverlerinde osyndaı 10 kitaphana ornatý josparlanǵan.

Jumys sapary barysynda qala ákimine jeke ınvestor esebinen Máýlenov kóshesin abattandyrý jobalary kórsetildi.

Shahar basshysy Seıfýllın dańǵylyndaǵy 450, 452, 452/1, Jibek joly kóshesiniń buryshyndaǵy aýlalardy rekonstrýktsııalaýdyń barysyn qarap shyqty.

«Bıýdjetke qatysý» jobasy aıasynda aýdanda Áýezov pen Áıteke bı kósheleriniń qıylysyndaǵy A. Baıtursynov atyndaǵy jáne «ARO» skverleri abattandyrylýda.

Varlamov kóshesinde joba aıasynda skeıt-park salyndy.


Joǵary qaraı