Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Almatyda jolaıryqtar men kóshelerdi uzartý jumystary qashan aıaqtalady

2021 jyldyń 14 qazan 2021 18:20

ALMATY. QazAqparat - Almaty ákimi Baqytjan Saǵyntaev jolaıryqtar men kóshelerdi uzartý jumystaryn tekserdi, dep habarlaıdy QazAqparat tilshisi.

«Áýejaı aınalymynda» tórt jáne alty jolaqty qozǵalysy bar úsh deńgeıli jolaıryǵynyń qurylysy júrip jatyr. Búginde Qulja traktisi boıyndaǵy uzyndyǵy 784 metr bolatyn eki estakadanyń biriniń qurylysy aıaqtalýǵa jaqyn. Qarasha aıynda onyń boıymen kólik qozǵalysyn ashý josparda.




Buqtyrma kóshesi boıynda 570 metrlik týnnel ótkeli salynyp jatyr. Jer deńgeıimen barlyq oń jaqty kireberister, sondaı-aq «Alataý» shaǵyn aýdany baǵyty boıynsha jolǵa shyǵý qarastyrylǵan. Jolaıryq kólik aǵyndarynyń qıylysýyn boldyrmaýǵa múmkindik beredi.

Qulja traktisiniń kólik ótkizý qabileti 15%-ǵa artady. Buqtyrma kóshesi boıynda – 30%. Túrksib aýdany men Almaty oblysynyń qala mańyndaǵy eldi mekenderiniń 350 myńǵa jýyq turǵynynyń mobıldiligi artady.

Baqytjan Saǵyntaev sondaı-aq Rysqulov dańǵyly men Emtsov kóshesiniń boıyndaǵy kópirden turatyn barlyq baǵyttaǵy jol aıryǵynyń qurylys qarqynyn baǵalady. Estakadanyń uzyndyǵy – 186 metr. Jekelegen búıirli sezder boıynsha qozǵalys ashyq. Estakada qurylysyn keshiktirgen sońǵy 2 ýchaske alynyp tastaldy. Sonyń arqasynda qurylys qarqyny artty. Nysannyń daıyndyǵy – 80%.

Kólik aıryǵy Rysqulov dańǵylynda kólik ótkizý qabiletin táýligine 80 myń avtomobılge deıin, Emtsov kóshesindegi ótkizý qabiletin 40 myńǵa deıin arttyrýǵa múmkindik beredi.

Budan ózge, Almaty ákimi Abaı dańǵylyn úńgileýdiń barysymen tanysty. Momyshuly kóshesinen Naýryzbaı aýdanynyń ákimshilik ortalyǵyna deıin uzyndyǵy 3,5 shaqyrym ýchaskede qurylys júrip jatyr. Ár baǵytta qozǵalys úshin 3 jolaq, Áshimov kóshesiniń ústinen 400 metrlik estakada, trotýarlar men velosıped joldaryn salý qarastyrylǵan.

Nysannyń daıyndyǵy shamamen 85 paıyz. Metropolıten jelisiniń ústindegi 600 metrlik ýchaske aıaqtalǵannan keıin jyl sońyna qaraı jańarǵan dańǵyl boıynsha kólik qozǵalysyn ashý kózdelgen.




Naýryzbaı aýdany «Taýsamaly» shaǵyn aýdanyndaǵy Qonaev kóshesin rekonstrýktsııalaý aıaqtalýda. Uzyndyǵy 1,2 shaqyrymdyq joldy 2-den 4 jolaqqa deıin keńeıtedi, munda trotýarlar, velojoldar men aryq jelisi bolady. Nysan – 90 paıyz daıyn. Asfalttyń joǵarǵy qabatyn tóseý jumystary júrýde.

Almaty ákimi jumysty osy aıdyń sońyna deıin aıaqtaýdy tapsyrdy.

Qarasha aıynda abattandyrý úshin aǵash kóshetteri otyrǵyzylady.























Avtor Alma Muqanova
Basty sózder: Qurylys, Jol, Almaty,
Joǵary qaraı