Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Almatyda jol jóndeý jumystaryna 16 mlrd teńge jumsalmaq

2022 jyldyń 21 mamyr 2022 20:42

ALMATY. QazAqparat - Bıyl megapolıste uzyndyǵy 221 shaqyrym bolatyn 224 kóshe joldaryna ortasha jóndeý júrgizý josparlanyp otyr. Bul týraly Almaty qalalyq mobıldilik basqarmasynyń basshysy Ǵanı Myrzahanov málim etti, dep habarlaıdy QazAqparat tilshisi.

«Almaty qalasynda kóshe-jol jelisiniń uzyndyǵy - 3096 shaqyrym, onyń 234 shaqyrymynda qatty jabyn joq. Jaqsy jáne qanaǵattanarlyq jaǵdaıdaǵy joldar úlesiniń kórsetkishin 95%-ǵa deıin jaqsartý úshin 2025 jylǵa qaraı 234 km jańa jol salý, uzyndyǵy keminde 200 km joldarǵa jyl saıyn ortasha jóndeý jáne qalanyń barlyq kóshe-jol jelisin qamtı otyryp, 350 myń sharshy metr asfaltbeton jabynyna aǵymdaǵy jóndeý júrgizý josparlanyp otyr», - dedi basqarma basshysy.

Ǵanı Myrzahanov qazirgi ýaqytta qalanyń «Alǵabas», «Álmerek» jáne «Qaırat» shaǵyn aýdandarynda jumystar jalǵasyp jatqanyn atap ótti.

«Sonymen qatar, «Aqjar» shaǵyn aýdanynda uzyndyǵy 48 km jańa joldardyń qurylysy bastaldy. «Qaırat» jáne «Álmerek» shaǵyn aýdandary boıynsha jumystar Energotıimdilik jáne ınfraqurylymdyq damý basqarmasymen kelise otyryp, ınjenerlik jeliler qurylysynyń aıaqtalýyna qaraı júrgizilýde. «Alǵabas» shaǵyn aýdany boıynsha jumystar aǵymdaǵy aıdyń sońyna deıin jalǵasady, jyl sońyna deıin taǵy 9 km jol salý josparlanǵan. Jol jumystary energııa tıimdiligi jáne ınfraqurylymdyq damý basqarmasymen úılestire otyryp, ınjenerlik jeliler qurylysynyń aıaqtalýyna qaraı oryndalyp jatyr», - dedi ol.

Spıkerdiń aıtýynsha, megapolıste bıyl uzyndyǵy 221 km bolatyn 224 kóshege, onyń ishinde uzyndyǵy 56,9 km bolatyn qalanyń 19 magıstraldy kóshesine ortasha jóndeý júrgizilmek.

«Sondaı-aq, «Aqbulaq», «Darhan», «Qarasý», «Tastybulaq», «Shuǵyla» shaǵyn aýdandardaǵy joldar jóndeledi. Ortasha jol jóndeý jumystaryna shamamen 16 mlrd teńge jumsalmaq» , - dedi Ǵanı Myrzahanov.

Buǵan deıin Almatydaǵy 3 jolaıryqtyń qurylysy qashan aıaqtalatyny belgili boldy. Sondaı-aq, almatylyqtardyń 83 paıyzy qala ákimdigi júrgizip jatqan saýalnama aıasynda jeke kólikterdiń avtobýs jolymen júrýine qarsy daýys bergen .


Joǵary qaraı