Aýa raıy
Astana -6 °S
Almaty -5 °S
valıýta baǵamy
USD 421.58
EUR 496.83
RUB 5.53
CNY 62.20

Almatyda taǵy birneshe aǵash zańsyz kesildi

2020 jyldyń 25 qarasha 2020 17:01

ALMATY. QazAqparat – Almatydaǵy «Kóktem-2» shaǵynaýdanynda birneshe aǵash zańsyz kesildi. Bul týraly Jasyl ekonomıka basqarmasynan málim etti, dep habarlaıdy QazAqparat tilshisi.

Bul joly Tımırıazev kóshesiniń boıynda ornalasqan «KFC» jyldam tamaqtaný jelisi mańynda tórt qaraǵashty zańsyz kesip tastaý faktisi anyqtaldy.

Almaty qalalyq Jasyl ekonomıka basqarmasynan atap ótkendeı, atalǵan mekenjaı boıynsha aǵash kesýge ótinish túsken joq jáne eshqandaı ruqsat berilmegen.

«Dúısenbi kúni Almaty Polıtsııa departamentimen birge jer ýchaskesiniń ıesi R.Esenǵalıevke qatysty QR Ákimshilik kodeksiniń 386-baby (Jasyl aımaqtardy kútip ustaý jáne qorǵaý erejelerin buzý) boıynsha ákimshilik hattama jasaldy jáne zańǵa sáıkes 15 AEK aıyppul salyndy», - dep habarlady basqarmadan.

Ótemaqy retinde jalpy paıdalaný oryndarynda 40 japyraqty kóshet otyrǵyzylatyn bolady.

Eske sala ketsek, 23 qarashaǵa qaraǵan túni Almatyda saýda úıiniń janynda (Áýezov-Tóle bı kósheleriniń qıylysy) jaıqalǵan emen men qaraǵash otaldy. Buǵan qatysty turǵyndar áleýmettik jelide narazylyq bildirdi.

«Qazir aýdan ákimdigi men Polıtsııa departamenti kesilgen aǵashtardyń tuqymy men sapasyn anyqtaý úshin oqıǵa ornynda jumys istep jatyr. Aıypty tulǵalar anyqtalǵan soń Polıtsııa departamenti olardy jaýapkershilikke tartady. Tolyǵyraq aqparatty anyqtaý jumystary aıaqtalǵan soń jarııalaımyz», - dep málim etken bolatyn qala ákimdiginen.

Keıin Almaty qalalyq Jasyl ekonomıka basqarmasy saýda úıiniń aldyndaǵy aǵashtardyń jappaı kesilýiniń mán-jaıyn anyqtady.

Bul jaǵdaıǵa Prezıdent Qasym-Jomart Toqaev nazar aýdaryp, Almaty ákimi Baqytjan Saǵyntaevqa qyzmettik tekserý júrgizýdi, kinálilerdi jaýapkershilikke tartýdy tapsyrdy.

24 qarasha kúni B.Saǵyntaev máseleni óz baqylaýyna alǵanyn málim etti.

Almaty prokýratýrasy zańsyz aǵash kesý faktisi boıynsha tergeý júrgizýde.




Avtor Alma Muqanova
Basty sózder: Aımaq, Almaty, Ekologııa,
Joǵary qaraı