Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Almatyda Pfizer vaktsınasyn qaı jerde saldyrýǵa bolady

2021 jyldyń 21 qazan 2021 13:22

ALMATY. QazAqparat – Almatyda barlyq vaktsına pýnktinde Pfizer vaktsınasyn saqtaýǵa arnalǵan jabdyqtar bar. Bul týraly qalalyq qoǵamdyq densaýlyq saqtaý basqarmasynyń basshysy Narıman Tabynbaev aıtty, dep habarlaıdy QazAqparat tilshisi.

«Almatyda koronavırýsqa qarsy Pfizer vaktsınasy qaladaǵy barlyq vaktsına pýnktine jetkiziledi. Keshe Pfizer vaktsınasyn qoldaný boıynsha naqty aqparat aldyq. Qazir bizde 137 vaktsına pýnkti jumys istep tur, sol jerdiń barlyǵynda Pfizer vaktsınasyn saldyrýǵa bolady. Bul vaktsınany birinshi kezeńde saldyra alatyn úkimet bekitken adamdardyń úsh toby bar ekenin bilemiz. Olar: 12-18 jasqa deıingi balalar, júkti áıelder jáne emshektegi balasy bar áıelder. Almaty boıynsha qazir vaktsınany mamandardy úıge nemese mektepke shaqyryp saldyrýǵa bolady», - dedi basqarma basshysy.

Onyń aıtýynsha, qazir qalada vaktsına saldyrýǵa jatatyn 176 600 bala men emshektegi balasy bar 67 myń áıel jáne 20,5 myń júkti kelinshek bar.

«Bizde osyndaı tizim bar, alaıda vaktsına adamdardyń óz erki boıynsha salynady. Sondaı-aq ata-analardyń ruqsaty bolýy kerek. Dál qazir qansha adamnyń qaı vaktsına pýnktinde vaktsına saldyratynyn, mamandardyń qaı mektepke baryp vaktsına salatynyn bilmeımiz. Bul nıet bildirgen adamdarǵa baılanysty belgili bolady», - dedi ol.

Megapolıste ornalasqan barlyq vaktsına pýnktinde Pfizer vaktsınasyn saqtaýǵa arnalǵan jabdyqtar bar.


Joǵary qaraı