Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Almatyda mekteptegi oryn tapshylyǵyn joıý úshin ne istelip jatyr

2021 jyldyń 19 qyrkúıek 2021 15:51

ALMATY. QazAqparat - Almatynyń Bostandyq aýdanyndaǵy mektep 425 orynǵa keńeıdi, dep habarlaıdy QazAqparat tilshisi.

Qala kúninde Almaty ákimi Baqytjan Saǵyntaev bıylǵy oqý jylynda esigin ashqan №199 mektep-gımnazııanyń jańa korpýsynda boldy.

Bostandyq aýdanyndaǵy №199 gımnazııanyń 425 oryndyq jańa korpýsy mekteptegi oqýshy ornynyń tapshylyǵyn tolyǵymen jabatyn boldy.

«Kóp jumys jasaldy, qazir bizdiń gımnazııanyń keńeıgenine óte qýanyshtymyn. Búginde aýdanymyz ósýde, kóptegen jańa úıler salynýda, oqýshy oryndary jetispeıtindikten, mektepter salý qajet», - dedi qala ákimine bilim berý ardageri Ásem Súleımenqyzy Bespaeva.




Qurylys jumystary ótken jyly bastalǵan, al 2021 jyldyń qyrkúıeginde mektep júzdegen oqýshylarǵa esigin ashty.

№199 kórkemdik-estetıkalyq jáne ıtalıan tiline mamandandyrylǵan gımnazııa mektebiniń dırektory Sandýǵash Nyshanova bul bilim mekemesi 2017 jyly №2 balalar úıiniń ǵımaratynyń bazasynda uıymdastyrylǵanyn atap ótti.

1962 jyly salynǵan eski ǵımarat barlyq qajettilikti qanaǵattandyrmady jáne kóp balaǵa eseptelmegen.

Sondyqtan, ákimdik jańa bilim ǵımaratyn salý arqyly ony jańǵyrtýǵa sheshim qabyldandy.

«Jańa mektep ǵımaraty úsh qabatty. Onda 240 oryndyq ashana, akt zaly, úlken sport zaly, zamanaýı kitaphana jáne muǵalimder bólmesi bar. Bul ǵımarat zamanaýı mekteptiń barlyq standarttary men normalaryna sáıkes keledi. Synyptar kompıýtermen jabdyqtalǵan, kórkem sabaqtar ótkizýdiń barlyq arnaıy qurylǵylarymen jabdyqtalǵan», - dedi gımnazııa mektebiniń dırektory.

Onyń aıtýynsha, jańa korpýsty salyp bergennen bólek, qorshaý aýystyryldy, aýmaq abattandyrylyp, aǵash otyrǵyzyldy.

Mektepti, kitaphanany bezendirýdiń dızaınyn mektep ujymy ózderi jasaǵan.

Almaty qalasy ákimdiginiń málimetinshe, 2021-2022 oqý jylynda jalpy kontıngenti 300 myńnan asatyn 289 mektep bar, onyń 207-si - memlekettik jáne 82-si - jekemenshik mektep.

Oqýshy oryndarynyń tapshylyǵyn kezeń-kezeńimen sheshý úshin bilim berý obektileriniń qurylysy júrgizilýde.

Jalpy qaladaǵy mektep oqýshylaryna jaıly oqý úderisin qamtamasyz etý maqsatynda bıyl 12 600 oryndyq 8 mektep salynýda: 5100 oryndyq 3 mektep jeltoqsanda beriledi, qalǵan 5 mektep 2022 jyly ekinshi toqsanda paıdalanýǵa beriledi.

Jalpy, jyl sońyna deıin jalpy sany 16 myń oqýshy orny bar 31 bilim nysany iske qosylady.


Joǵary qaraı