Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Almatyda qańtar oqıǵasy kezinde urlyq jasaǵan jigittiń bas bostandyǵy shekteldi

2022 jyldyń 16 mamyr 2022 18:47

ALMATY. QazAqparat – Almatyda qańtar oqıǵasy kezinde urlyq jasaǵan sottalýshyǵa bas bostandyǵyn shekteý jazasy taǵaıyndalyp, sot zalynan bosatyldy, dep habarlaıdy QazAqparat tilshisi.

Almaty qalalyq sotynyń baspasóz qyzmeti habarlaǵandaı, qańtar aıynyń 6-synan 7-sine qaraǵan túni qaraǵandylyq 23 jasar azamat Maxima oıyn-saýyq kesheniniń janynan ótip bara jatqanda, terezeleriniń synǵanyn kórgen.

«Sottalýshy keshenniń ishine kirip, ekinshi qabattaǵy Prato dúkeninen quny 33 333 teńgelik Iphone-6 markaly uıaly telefonyn, keıin Monamie dúkeninen quny 30 351 teńge Dior ıis sýynyń eki qutysyn urlaǵan. Sotpen bul áreketter Qylmystyq kodekstiń 188-baby, 3-bóliginiń 2, 3-tarmaqtary boıynsha urlyq, ıaǵnı, qoımaǵa zańsyz kirý arqyly birneshe ret jasalǵan bótenniń múlkin jymqyrý dep tanyldy. Sottalýshy óz kinásin moıyndap, basqa adamdardyń dúkenderden zat alyp jatqanyn kórgen soń ózi de kirip, taýardy urlaǵanyn alǵa tartty. Al Qylmystyq kodekstiń 188-baby, 3-bóliginiń 2, 3-tarmaqtary boıynsha eki jyldan jeti jylǵa deıingi merzimge bas bostandyǵyn shekteýge, ne sol merzimge bas bostandyǵynan aıyrý jazasy qarastyrylǵan. Sot onyń jastyǵyn, kinásin moıyndaǵanyn, shyn nıetpen ókingenin jáne birinshi sottylyǵyn eskere otyryp, mınımaldy eki jyl merzimge bas bostandyǵyn shekteý jazasyn taǵaıyndady», - delinedi qalalyq sottyń taratqan habarlamasynda.

Sottalýshy azamat sot zalynda qamaýdan bosatyldy. Onyń kúzetpen ustalǵan ýaqytynyń bir kúni bas bostandyǵyn shekteý túrindegi jazany óteýdiń eki kúni esebimen esepke jatqyzyldy. Úkim zańdy kúshine engen joq.

Aıta keteıik, buǵan deıin qańtar oqıǵasynda 150 adam aýyr qylmys jasady degen kúdikke ilingenin, jaýapqa tartylǵan 275 adamnyń 31-i sottalǵany jáne qańtar oqıǵasy boıynsha 12 kúdikti qamaýdan bosatylǵany týraly habarlaǵan bolatynbyz.


Avtor Dýman Arǵyngeldi
Basty sózder: Almaty, Qańtar oqıǵasy, Sot,
Joǵary qaraı