Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Almatyda baýyrynyń 75% zaqymdanǵan áıelge sátti ota jasaldy

2022 jyldyń 20 qańtar 2022 14:44

ALMATY. QazAqparat - Almatyda parazıt saldarynan baýyrynyń 75%-y zaqymdanǵan áıelge ota jasaldy, dep habarlaıdy QazAqparat tilshisi.

50 jastaǵy patsıent №7 qalalyq klınıkalyq aýrýhanaǵa josparly túrde kelip túsken.

Oǵan parazıt saldarynan bolatyn aýyr dert – baýyr alveokokkozy dıagnozy boıynsha shuǵyl túrde ota jasaý týraly sheshim qabyldandy.

Kúrdeli ota mindetti áleýmettik medıtsınalyq saqtandyrý paketi sheńberinde jasaldy.

Klınıkanyń baspasóz qyzmeti taratqan habarlamaǵa súıensek, patsıent osydan biraz buryn oń jaq búıiri aýyrlap, ishiniń formasy buzylyp, bultıǵanyn baıqaǵan.

Aıtýynsha, osy ýaqytqa deıin aýrýdyń basqa belgileri bilinbegen.

Ýltradybystyq zertteýden keıin áıeldiń oń jaq qabyrǵasynyń astynda úlken isik paıda bolyp, baýyrdyń alǵa qaraı jyljyp ketkeni belgili boldy.

Bul dertti emdeýdiń birden-bir tásili – baýyrdyń bir bóligin kesip alyp tastaý. Ony qan tamyry hırýrgııasyn jaqsy biletin tájirıbeli gepatohırýrgtar ǵana jasaı alady.




Sebebi, ota barysynda baýyrdyń zaqymdanǵan bóligin alyp qana qoımaı, óttiń jumysyn retteý qajet.

Sondyqtan mundaı kúrdeli operatsııalar iri mýltıdıstsıplınarlyq, joǵary mamandandyrylǵan, zamanaýı tehnologııalarmen jabdyqtalǵan klınıkalarda ǵana jasalady.

№7 aýrýhananyń gepatopankreatobılıarly hırýrgııa bólimi dárigerleri kúrdeli ota jasap, nátıjesinde salmaǵy 3,5 kelige jetken alyp alveokokkoz qurtyn alyp tastady.




Baýyrdyń edáýir bóliginiń zaqymdanýy men patsıenttiń V gepatıtimen aýyratyny jaǵdaıdy qıyndata tústi.

Hırýrg mamandar laparotomııa, oń jaq gemıgepatektomııa jasap, baýyrdyń zaqymdanǵan 75% bóligin alyp tastaýǵa májbúr boldy.

On saǵatqa sozylǵan otany professor Mýsa Sahıpov, kómekshisi Ańsat Taýbaldıev, Núrken Jeldibaev, anestızıolog Marat Lekerovten quralǵan kásibı mamandar toby jasap shyqty.

Dárigerler qan ketý qaýpiniń aldyn alyp, nátıjesinde qosymsha qan quıý qajettigin joıdy.

Patsıent qazir aýrýhanadan shyǵyp, qalypty ómirge oraldy.

«№7 aýrýhana dárigerleriniń biliktiligi men sheberligi aldynda basymdy ıemin. Ásirese, meni aman alyp qalǵan dárigerlerge, anestızıologqa, professor Mýsa Sahıpovqa alǵysym sheksiz. Alla razy bolsyn! Aýyr dertten aryldym. Barshańyzǵa ýaqtyly qaralyp, densaýlyqty kútýge keńes berer edim», - dedi ol.

Aıta ketsek, samandar deregi boıynsha alveokokkoz juqqan kúnnen bastap 10 jylǵa deıin eshbir klınıkalyq belgi bermeýi múmkin.

Sebebi, baýyrǵa jabysqan qurt óte baıaý ósedi.

Alveokokkoz – jalpaq qurt (Echinococcus multilocularis) jumyrtqasynyń adam aǵzasyna túsýinen paıda bolatyn parazıtarlyq aýrý.

Qurt aǵzaǵa jýylmaǵan jemis-jıdek, las sý men balyq, úı janýarlary arqyly túsýi múmkin.

Alveokokkoz saldarynan adamnyń mańyzdy organdary, sonyń ishinide basy men ókpesi zaqymdanyp, múgedek bolyp qalýy múmkin.

Qurt aǵzanyń kez-kelgen bóliginde kezdesýi múmkin, kóbine ol baýyrǵa jabysady.


Joǵary qaraı