Aýa raıy
Astana -10 °S
Almaty -6 °S
valıýta baǵamy
USD 421.58
EUR 496.83
RUB 5.53
CNY 62.20

Almatyda aǵashtardyń jappaı kesilý oqıǵasyna qatysty kúdikti anyqtaldy

2020 jyldyń 25 qarasha 2020 19:43

ALMATY. QazAqparat - Almatyda Tóle bı kóshesindegi saýda úıiniń aldyndaǵy sırek kezdesetin aǵashtardy kesip tastaǵan kúdikti anyqtaldy, dep habarlaıdy QazAqparat tilshisi.

«Sarapshy mamandar kesilgen aǵashtardyń Qazaqstannyń Qyzyl kitabyna engen emen aǵashy ekenin anyqtady. Bul, aǵashtardyń sırek kezdesetin jáne azaıyp bara jatqan túri, erekshe ósimdik. Ol joıylyp ketýdiń aldynda tur», - dedi onlaın brıfıng barysynda Almaty qalalyq Jasyl ekonomıka basqarmasynyń bastyǵy Natalıa Lıvınskaıa.

Almaty qalalyq Polıtsııa departamenti bastyǵynyń orynbasary Rýstam Ábdirahmanovtyń aıtýynsha, buǵan deıin sotqa deıingi tergep-tekserý QR Qylmystyq kodeksiniń 340-baby boıynsha júrgizilse, endi ol 339-baptyń 2-bóligine (sırek kezdesetin jáne quryp ketý qaýpi tóngen ósimdik túrlerin zańsyz qurtý) aýystyryldy.

«Biz bul qylmysqa qatysy bar barlyq adamdardy anyqtaımyz. Basty kúdikti anyqtaldy. Ol Almaty qalasynyń turǵyny. Ol - aýmaqty abattandyrý boıynsha kelisimshartqa otyrǵan jáne 10 jumysshy jaldaǵan JK basshysy. 11 aǵash zańsyz otalǵan, onyń 9-y Qyzyl kitapqa engen. Qazir birqatar saraptamalyq zertteýler taǵaıyndaldy. Tergeýshi barlyq ýákiletti organdarǵa tıisti sýraýlar joldady. Qylmystyq is tergeý satysynda», - dedi Rýstam Ábdirahmanov.

Sonymen qatar, ol Sulpak kompanııasynyń da jaýapkershiligi qarastyrylyp jatqanyn atap ótti. Óıtkeni aýmaqty abattandyrý boıynsha kelisimshart osy kompanııamen jasalǵan.

Eske sala ketsek, 23 qarashaǵa qaraǵan túni Almatyda saýda úıiniń janynda (Áýezov-Tóle bı kósheleriniń qıylysy) jaıqalǵan emen men qaraǵash otaldy. Buǵan qatysty turǵyndar áleýmettik jelide narazylyq bildirdi.

Keıin Almaty qalalyq Jasyl ekonomıka basqarmasy saýda úıiniń aldyndaǵy aǵashtardyń jappaı kesilýiniń mán-jaıyn anyqtady.

Bul jaǵdaıǵa Prezıdent Qasym-Jomart Toqaev nazar aýdaryp, Almaty ákimi Baqytjan Saǵyntaevqa qyzmettik tekserý júrgizýdi, kinálilerdi jaýapkershilikke tartýdy tapsyrdy.

24 qarasha kúni B.Saǵyntaev máseleni óz baqylaýyna alǵanyn málim etti.

Almaty prokýratýrasy zańsyz aǵash kesý faktisi boıynsha tergeý júrgizýde.

Al búgin Almaty qalasynda taǵy birneshe aǵash zańsyz kesilgeni anyqtaldy.


Joǵary qaraı