Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Almaty taýlarynda týrısterdiń qaýipsizdigi úshin 15 qutqarý lashyǵy ornatyldy

2021 jyldyń 20 qazan 2021 21:24

ALMATY. QazAqparat - Almaty taýlarynda qaýipsizdikti qamtamasyz etý keshendi is-sharalary aıasynda qutqarý lashyqtary ornatylyp jatyr. Bul týraly qala ákimi Baqytjan Saǵyntaev «Almaty» telearnasyndaǵy Akimat LIVE baǵdarlamasynyń tikeleı efırinde málimdedi, dep habarlaıdy QazAqparat tilshisi

Tikeleı efırde qala turǵyndarynyń suraqtaryna jaýap bere otyryp, Baqytjan Saǵyntaev modýldi qutqarý lashyqtary taýlarǵa tikushaqtardyń kómegimen jetkiziletinin habarlady.

«Tikushaqtar modýldi qutqarý lashyqtaryn taýdaǵy ornatý oryndaryna jetkizedi. Sebebi, taýly jerlerde kólikpen júrý óte qıyn, sondyqtan tikushaqtar paıdalanylady», - dep jaýap berdi B. Saǵyntaev.

Qala ákimi aıtqandaı, qutqarý modýlderi qıyn jaǵdaıǵa tap bolǵan, aýa raıynyń qolaısyzdyǵy úshin taýda qalǵan týrıster arasynda jazataıym oqıǵalardyń aldyn alý maqsatynda ornatylǵan.

Búginde 15 qutqarý lashyǵy 7 núktede - «Joǵarǵy Gorelnık», «Tuıyqsý» muzdyǵynyń sońǵy morenasy, «Lýnnaıa polıana», «Prohodnoe» shatqaly, «Úlken Almaty» shatqaly, «Qyzylsaı shatqaly» jáne «Sol jaqtaǵy Talǵar» jerlerinde ornatyldy.

Qarasha aıynyń sońyna deıin taǵy 8 lashyq ornatý josparlanyp otyr.

Ár lashyq qutqarýshylar pýltine sıgnal berý úshin «SOS» batyrmasymen jabdyqtalǵan.

Sondaı-aq, lashyqtyń ishi jylytylady ári munda alǵashqy medıtsınalyq kómek paketi, uıaly telefondy zarıadtaý, jyly kórpe jáne buzylmaıtyn ónimder jıyntyǵy bar.

Aıta keterligi, týrısterdiń taý lashyqtaryn paıdalanǵan jaǵdaılary boldy.

Keıbireýler baǵyttyń ýaqytyn nemese óz kúshin esepteı almasa nemese aýa raıy buzylsa sol jerde qalyp, túneıdi.

Sonymen qatar, qazirgi ýaqytta Shymbulaq pen Medeýde vızıt-ortalyqtar jumys isteýde.

Osyndaı ortalyqtar Aıýsaı shatqalynda jáne Gorelnık jylý kóziniń janynda ashylǵan. Munda taýlardaǵy qaýipsiz tártip boıynsha nusqaýlyq ótkizilip turady.

Sondaı-aq, týrısterdiń qaýipsizdigi úshin uıaly baılanyspen qamtý aımaǵy keńeıtilýde.

Kishi jáne Úlken Almaty shatqaldarynda 2 baqylaý-qutqarý pýnkti, Tuıyq sý shatqalynda tikushaq alańy salynýda, qutqarý jasaqtaryna dabyl berý túımeleri bar 10 radıorelelik dińgek ornatylyp jatyr.


Avtor Dýman Arǵyngeldi
Basty sózder: Qaýipsizdik, Almaty, Týrızm, Ákim,
Joǵary qaraı