Aýa raıy
Astana -19 °S
Almaty -13 °S
valıýta baǵamy
USD 421.58
EUR 496.83
RUB 5.53
CNY 62.20

Almaty oblysynda 9 adam qar qursaýynan qutqaryldy

2020 jyldyń 21 qarasha 2020 14:20

TALDYQORǴAN. QazAqparat - Almaty oblysynyń TJ mamandary 9 adamdy qar qursaýynan qutqardy, - dep habarlaıdy QazAqparat tilshisi.

20 qarashada Almaty oblystyq Tótenshe jaǵdaılar departamentiniń qyzmetkerleri respýblıkalyq mańyzy bar «Úsharal-Dostyq» tasjolynda qutqarý jumystaryn júrgizdi.

Dostyq beketindegi №20 órt sóndirý bóliminiń qyzmetkerleri «Yrǵaıty» men «Jalańashkól» ýchaskeleri arasynda úsh adamdy qar qursaýynan qutqardy.

Sol kúni keshke qaraı 112 telefonyna «Yrǵaıty» ýchaskesiniń mańynda adamdardy evakýatsııalaý qajettigi týraly habarlama tústi. Oqıǵa ornyna Aqshı aýylynan Alakól óńiriniń qutqarýshylary bardy. Olar 6 adamdy, onyń ishinde 1 balany qutqardy. Qutqarylǵandardyń barlyǵy medıtsınalyq kómekke muqtaj bolmady.

Esterińizge sala keteıik, «QazAvtoJol» UK AQ Almaty oblystyq fılıaly men «Kazahavtodor» JShS Almaty oblystyq fılıalynyń aqparaty boıynsha 20 qarashada saǵat 16.30-dan bastap qarly boran saldarynan respýblıkalyq mańyzy bar «Úsharal-Dostyq» jolynda (84 shaqyrymnan 184 shaqyrymǵa deıin) kólik qozǵalysy barlyq transport túrlerine jabylǵan bolatyn. Osy aqparatty, Almaty oblysynyń Tótenshe jaǵdaılar departamenti turǵyndarǵa SMS, Darmen uıaly qosymshasy, vedomstvolyq saıttar men áleýmettik jeliler arqyly eskertken edi. Qutqarylǵan jolaýshylar jolǵa, onyń jabylǵanyna deıin shyqqan eken.

Qysta joldarda tótenshe jaǵdaılardy boldyrmaý úshin Tótenshe jaǵdaılar departamenti aýa raıynyń ózgerýin, meteorologııalyq esepterdi qadaǵalaýǵa, 112 qyzmetiniń SMS habarlamalaryn nazardan tys qaldyrmaýǵa jáne eger aýa raıy nasharlap, jolda kólik qozǵalysyna shekteý engizilse, jolǵa shyqpaý keregin eskertedi.


Avtor Samal Qabysheva
Basty sózder: Almaty oblysy, Aýa raıy, Kólik,
Joǵary qaraı