Almaty oblysy: Ákimdik stadıon úshin «kesilgen» aǵashtarǵa túsinik berdi
ALMATY. QazAqparat – Almaty oblysy Eńbekshiqazaq aýdanynyń ákimdigi Shelek aýylynda stadıon salý úshin toǵaıdaǵy aǵashtardyń kesilýi múmkindigi týraly aqparatqa jaýap berdi, dep habarlaıdy QazAqparat tilshisi.
Ekobelsendi Saltanat Táshimova Facebook-paraqshasynda stadıonnyń qurylysy úshin Shelektegi jalǵyz toǵaı kesiletindigi jóninde jazdy. Onda kópjylǵy 400 aǵash bar.
Eńbekshiqazaq aýdany ákimdiginiń baspasóz qyzmeti atalmysh jazbaǵa jaýap berdi.
«Shelek aýylynda toǵaıdaǵy 400 aǵashty kesý bastalǵany týraly jazbańyzǵa kelesini habarlaımyn, osy ýaqytqa deıin Shelek aýylynyń toǵaıynda birde-bir aǵash otalǵan joq. Toǵaıda stadıon bar. 2022 jylǵa qaraı Shelek aýylynda 3,40 ga aýmaqta dene shynyqtyrý-saýyqtyrý keshenin salý josparlanýda. Búgingi kúnde qurylystyń jobalaý-smetalyq qujattary daıyndalýda», - dep jaýap berdi aýdan ákimdiginde.
Avtor: Elaman Turysbekov
