Aýa raıy
Astana 28 °S
Almaty 31 °S
valıýta baǵamy
USD 405.66
EUR 454.70
RUB 5.71
CNY 57.43

Álem Halyqaralyq ilbis kúnin atap ótýde

2019 jyldyń 23 qazan 2019 13:46

ALMATY. QazAqparat – Búgin Qazaqstan Halyqaralyq ilbis kúnin atap ótýde. Qyzyl kitapqa kirgizilgen janýardyń Qazaqstanda nesheýi qalǵanyn QazAqparat tilshisi anyqtady.

Іlbis - Qyzyl Kitapqa kirgizilgen kóp janýardyń biri ǵana emes, ol - táýelsiz Qazaqstannyń ulttyq sımvoly. Jalpy, álemde, sarapshylardyń aıtýynsha, shamamen 4000 shaqty ilbis qalǵan.

Qazaqstandaǵy sany 130-150 aınalasynda. Olar negizinen Tıan-Shan, Jetisý Alataýy, Tarbaǵataı, Saýyr, Altaı taýlaryn mekendeıdi.

Ekologtar barys popýlıatsııasyn saqtaýdyń basty sharttarynyń biri olardy jurtshylyqqa nasıhattaý ekendigin aıtady. BUU Damý baǵdarlamasynyń joba menedjeri Talǵat Kerteshevtiń aıtýynsha, Qazaqstandaǵy barys popýlıatsııasyn qadaǵalaý baǵdarlamasynyń aıasynda 290 fototuzaq satyp alynǵan. Olar Almaty, Túrkistan jáne Shyǵys Qazaqstan oblystaryndaǵy qoryqtar men ulttyq parkterge qoıyldy.

BUU Damý baǵdarlamasy ókilderiniń sózine qaraǵanda, sońǵy úsh jylda ilbis aýlaǵan birde-bir brakoner bolmaǵan.

Aıta keteıik, 2013 jyly ilbisti saqtap qalýǵa arnalǵan Bishkek dúnıejúzilik forýmynda 12 el — Qazaqstan, Qyrǵyzstan, Ózbekstan, Tájikstan, Aýǵanstan, Pákistan, Mońǵolııa, Qytaı, Úndistan, Nepal, Býtan jáne Reseı ókilderi bas qosqan.

Eske salaıyq, ilbis popýlıatsııasyn saqtaý men brakonerlikke qarsy sharalardyń mańyz týraly BUU Damý baǵdarlamasy turaqty ókiliniń ilbisti saqtaý máseleleri jónindegi orynbasary Vıtalıı Vremısh aıtyp bergen bolatyn.

Avtory: Elaman Turysbekov

Basty sózder: Ekologııa, Álem, Halyqaralyq uıymdar,
Joǵary qaraı