Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Alekseı Tsoı Aqtóbede koronavırýs ınfektsııasyna qarsy shtabtyń otyrysyn ótkizdi

2021 jyldyń 21 shilde 2021 23:10

AQTÓBE. QazAqparat - Densaýlyq saqtaý mınıstri Alekseı Tsoı jumys saparymen Aqtóbege keldi. Óńirde koronavırýs ınfektsııasyna qarsy shtabtyń otyrysy ótti, dep habarlaıdy QazAqparat tilshisi oblys ákiminiń baspasóz qyzmetine silteme jasap.

Shtab otyrysyna oblys ákiminiń birinshi orynbasary Rýslan Hambarov, QR Densaýlyq saqtaý mınıstrliginiń ókilderi, Aqtóbe oblysy departamentteriniń , alǵashqy medıtsınalyq-sanıtarlyq kómek kórsetý uıymdarynyń basshylary, aýdan ákimderi beıne baılanys arqyly qatysty.

«Uıymdasqan-ádistemelik kómek kórsetý úshin óńirge Densaýlyq saqtaý mınıstrliginiń jumys toby jiberilgen bolatyn. Bizdiń mindetimiz - barlyq ózekti máselelerdi qarap anyqtaý jáne qaısysyn erekshe baqylaýǵa alý keregin túsiný»,- dedi Alekseı Tsoı.

Basqosýda oblystyq sanıtarııalyq-epıdemıologııalyq baqylaý departamenti men densaýlyq saqtaý basqarmasynyń basshylary epıdemıologııalyq jaǵdaı týraly baıandady.

Pandemııa bastalǵaly óńirde 14 myńnan astam adamnan koronavırýs ınfektsııasy anyqtaldy.

Ázirlengen 24 ınfektsııalyq statsıonardyń 18-i iske qosylǵan. 795 kereýetke adam jatqyzylsa, onyń 115-i reanımatsııalyq, 2808 kereýet rezervte.

37 medıtsınalyq mekeme halyqqa ambýlatorııalyq-emhanalyq kómek kórsetedi. 173 mobıldi brıgada jumys isteıdi.

Medıtsınalyq mekemelerdiń materıaldyq-tehnıkalyq bazasyn nyǵaıtatyn jáne olardy dári-dármekpen qamtamasyz etetin barlyq qajetti sharalar qabyldandy.

Oblysqa 398 575 doza vaktsına ákelinse, birinshi komponentimen 206 271 adam, ekinshi komponentimen 12 304 adam egildi.

Reıd nátıjesi boıynsha 47 baqylaý toby 57 mln teńgege 464 aıyppul saldy.

Bıznestiń 930 sýbektisi Ashyq qosymshasyn qoldanady. Oqshaýlaý tártibin buzǵan 204 adam anyqtalyp, «qyzyl» mártebesi bar bes aqtóbelik ákimshilik jazaǵa tartyldy.

Densaýlyq saqtaý vıtse-mınıstri Ajar Ǵınııat koronavırýs ınfektsııasyna shaldyqqan naýqastarǵa medıtsınalyq kómek kórsetý jaıyn aıtty.




QR DM SEBK tóraıymy Aıjan Esmaǵambetova epıdemıologııalyq jaǵdaıdyń saraptamasyn usyndy.

QR Densaýlyq saqtaý mınıstrligi jumys tobynyń usynystaryn oryndaý maqsatynda oblystyq densaýlyq saqtaý basqarmasy janynan, sonymen qatar, alǵashqy medıtsınalyq-sanıtarııalyq kómek kórsetý uıymdarynda ahýaldyq ortalyqtar uıymdastyrylyp, M.Ospanov atyndaǵy BQMÝ professor-oqytýshylar quramyn tarta otyra onlaın tártibinde satylaı oqytý júrgizildi.

«Bizdiń mindetimiz - koronavırýsqa qarsy kúreste búkil kúshti biriktirip, Memleket basshysynyń medıtsınalyq mekemelerdi jaryqtandyrý, naýqastardy emdeý ádisin engizý jáne basqa da ózekti suraqtardy sheshý boıynsha tapsyrmalaryn oryndaý jumystaryn kúsheıtý. Biz barlyq baǵyt boıynsha qoldaý kórsetýge daıynbyz»,- dep qosty Densaýlyq saqtaý mınıstri.

Otyrys sońynda oblys ákiminiń birinshi orynbasary Rýslan Hambarov jumys tobynyń usynystaryn oryndaý jáne medıtsınalyq kómek kórsetý sapasyn jaqsartý boıynsha barlyq shara qabyldanatynyn aıtty.

«Aqtóbeniń desaýlyq saqtaý salasynyń áleýeti joǵary. Eń bastysy - jaqsy materıaldyq-tehnıkalyq baza, joǵary bilikti mamandar bar»,- dep atap ótti ol.





Joǵary qaraı