Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Aldaǵy 4 jylda 3,5 myń aýyldy damytýǵa 670 mlrd teńge jumsalady

2021 jyldyń 19 qazan 2021 09:51

NUR-SULTAN. QazAqparat – Aldaǵy 4 jylda «Aýyl – el besigi» jobasy aıasynda 3,5 myń aýyldy damytýǵa 670 mlrd teńge jumsalady. Bul týraly Úkimet otyrysynda QR Ulttyq ekonomıka mınıstri Áset Erǵalıev aıtty, dep habarlaıdy QazAqparat tilshisi.

«Kelesi 4 jyl ishinde 1,3 trln teńge bólinedi. Onyń ishinde «Aýyl - el besigi» aıasynda – 670 mlrd teńge. 2025 jylǵa deıin, damý áleýeti bar 3,5 myń aýyl qamtylady. Onda aýyl turǵyndarynyń 90 paıyzdan astamy turatyn bolady. Jalpy, aýyldyq jerlerdi damytý jónindegi keshendi tásil 2025 jyly aýyl turǵyndarynyń ómir súrý sapasy men ál-aýqatyn edáýir arttyrýǵa múmkindik beredi», - dedi Áset Erǵalıev atalǵan jobanyń oryndalýy jaıynda baıandaı kele.

Onyń atap ótýinshe, atqarylǵan jumystardyń nátıjesinde aýyl halqy sýmen jabdyqtaý qyzmetterimen 100 paıyz qamtylady. Joǵary jyldamdyqty ınternetke qoljetimdilik barlyq aýyl turǵyndary úshin qoljetimdi bolady. Aýyldyq jerlerde 24 mln sharshy metr turǵyn úı paıdalanýǵa beriledi.

«Jergilikti mańyzy bar joldardyń 95 paıyzy jaqsy jaǵdaıda bolady. 12 myń shaqyrym ınjenerlik jeliler salynady jáne jańǵyrtylady. 10 myń shaqyrym kent ishindegi joldar salynatyn jáne jóndeýmen qamtylady», - dedi mınıstr.


Joǵary qaraı