Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Aqylbek Kúrishbaev: JOO-lar stýdentterge ýnıversıtetke «qarjy túsirýdiń kózi» dep qaraıdy

2021 jyldyń 2 jeltoqsan 2021 12:42

NUR-SULTAN. QazAqparat – Senattyń jalpy otyrysynda depýtat Aqylbek Kúrishbaev Úkimetti joǵary oqý oryndaryndaǵy tárbıe jumystarynyń jaı-kúıine nazar aýdarýǵa jáne bul baǵytty jańa sapaly deńgeıge kóterýge shaqyrdy, dep habarlaıdy QazAqparat tilshisi.

Ol óziniń depýtattyq saýalynda jastar tárbıesine qatysty problemalar qoǵamda alańdaýshylyq týǵyzyp otyrǵanyn atap ótti.

«Bas prokýratýranyń málimeti boıynsha, elimizde jyl saıyn kolledjder men ýnıversıtetterdiń shamamen 1,5 myń stýdenti qylmystyq jaýapkershilikke tartylady. 2020 jyly 18-30 jas aralyǵyndaǵy 4 207 jas esirtki zattaryn paıdalanǵany úshin esepke alyndy. Olardyń ishinde ýnıversıtetterde oqıtyndar az emes», – dedi Aqylbek Kúrishbaev Úkimet basshysynyń orynbasary Eraly Toǵjanovtyń atyna joldaǵan saýalynda.

Sondaı-aq ol jastardyń ýnıversıtetterde kezdesetin problemalarǵa toqtaldy. Olar – psıhologtardyń, teologtardyń, sport bazalarynyń jetispeýshiligi, adamgershilik-patrıottyq tárbıeniń álsizdigi, shyǵarmashylyq belsendi jastardy qoldaý men damytýǵa tıisti kóńil bólinbeýi. Depýtat buǵan kóptegen joǵary oqý oryndarynda tárbıe jumystarynyń resmı sıpatta ǵana júrgizilýi sebep ekenin aıtty.

«Qazir ýnıversıtet basshylary stýdentterge «tárbıelenýshi tulǵa» retinde emes, ýnıversıtetke «qarjy túsirýdiń kózi» dep tym jaıdaq qaraıdy. Anyǵyn aıtsaq, kóptegen joǵary oqý oryndarynda kadrlardy daıyndaý qarapaıym bızneske aınalyp ketti. Tipti, ýnıversıtetterdi akkredıtteý júıesinde stýdentterdiń tárbıe jumysy qarastyrylmaǵan. Jalpy, bizdiń tárbıe júıemiz ulttyq qundylyqtarymyzǵa negizdelýi kerek. Ókinishke qaraı, sońǵy kezde, ásirese, halyqaralyq deńgeıdegi ýnıversıtetterde batystyq ustanymdarǵa elikteý oryn alýda», – dedi senator.

Osyǵan baılanysty Aqylbek Kúrishbaev elimizdiń joǵary oqý oryndaryndaǵy tárbıe jumysynyń jaı-kúıine synı taldaý júrgizýdi jáne ony qoǵamdaǵy qazirgi zamanǵy úrdister men damý basymdyqtaryna sáıkes sapaly jańa deńgeıge kóterý úshin qajetti sharalar qabyldaýdy usyndy.


Avtor Rýslan Ǵabbasov
Basty sózder: Senat, QR Úkimeti, JOO-lar, Jastar,
Joǵary qaraı