Aýa raıy
Astana -2 °S
Almaty 4 °S
valıýta baǵamy
USD 421.58
EUR 496.83
RUB 5.53
CNY 62.20

Aqylbek Kúrishbaev: Az qamtylǵan toptar úshin áleýmettik azyq-túlik qoryn qalyptastyrý qajet

2020 jyldyń 17 qyrkúıek 2020 12:08

NUR-SULTAN. QazAqparat – Parlament Senatynyń jalpy otyrysynda depýtattar QR Úkimet basshysyna jáne Respýblıkalyq bıýdjettiń atqarylýyn baqylaý jónindegi Esep komıtetiniń tóraıymyna depýtattyq saýal joldady, dep habarlaıdy QazAqparat tilshisi.

Senator Aqylbek Kúrishbaev zańda áleýmettik mańyzy bar azyq-túlik taýarlarynyń baǵasyn turaqtandyrýdyń naqty mehanızmi belgilengenin jáne bul maqsatqa bıýdjetten 30 mlrd teńgege jýyq qarjy bólingenin aıtty. Azyq-túlik taýarlarynyń baǵasyn turaqtandyrýǵa qatysty kóptegen suraqtar týyndaıdy.

«Birinshiden, saýda ortalyqtaryn tańdaý prıntsıpi túsiniksiz. Nege keıbir tańdaýlylar ǵana jeńildetilgen nesıege ıe bolady? Ekinshiden, azyq-túlik taýarlary baǵasynyń eleýli qubylýy kezinde onyń eń tómengi shegin aldyn ala boljaý óte qıyn. Óıtkeni, aýylsharýashylyq ónimderiniń baǵasy tek maýsym boıynsha ǵana emes, árbir jylda ózgerip otyrady», - dedi Senat depýtaty.

Aqylbek Kúrishbaev bul shemada saýda ortalyqtary tek otandyq aýylsharýashylyq taýarlaryn alýǵa mindettelmegenin, sol sebepti qazaqstandyq fermerler óz ónimderin ótkize almaı bıýdjet qarajaty sheteldik óndirýshilerdi qarjylandyrýǵa jumsalyp jatqanyn aıtty.

«Turaqtandyrý qorynyń baǵany retteýge, bıýdjet qarajatyn tıimdi paıdalanýǵa degen pármendiligi de kúmán keltiredi, sebebi onda sybaılas jemqorlyq kórinisteri basym. Meniń oıymsha, bul máselemen Sybaılas jemqorlyqqa qarsy is-qımyl agenttigi shyndap aınalysýy kerek», - dedi senator.

Sonymen qatar, senator baǵany retteý jónindegi memlekettik sharalar barlyq turǵyndarǵa paıdaly bolýy úshin, osy qorǵa satyp alynatyn azyq-túlik taýarlarynyń kólemin ulǵaıtý mańyzdy ekenin aıtty.

«Eger atalǵan maqsattarǵa bıýdjet qarajatyn kóbeıtý múmkindigi bolmasa, tikeleı az qamtylǵan otbasylar sanatyn qoldaýǵa kóshken durys. Ol úshin halyqtyń az qamtylǵan toptaryna arnap, áleýmettik azyq-túlik taýarlarynan qor qalyptastyrý qajet. Azyq-túlik taýarlaryn satyp alýdy jáne olardy saqtaý, tasymaldaý, ótkizý jónindegi qyzmetterdi fıýcherstik kelisim-shartpen konkýrstyq negizde tek otandyq taýar óndirýshilermen jasaý qajet. Bul maqsattarǵa uzaq jáne jeńildetilgen bıýdjettik nesıelerdi qarastyrý tıimdi», - dedi Aqylbek Kúrishbaev.


Joǵary qaraı