Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Aqtoty Raıymqulova jalaqynyń kóterilýi mádenıet qyzmetkerlerine qalaı áser etkenin aıtty

2021 jyldyń 17 maýsym 2021 18:19

NUR-SULTAN. QazAqparat – Mádenıet jáne óner uıymdary qyzmetkerleri jalaqysynyń ósýi shyǵarmashylyq-óndiristik qyzmettiń sapasyn arttyrdy.

Bul týraly QR Prezıdenti janyndaǵy Adam quqyqtary jónindegi komıssııa otyrysynda Mádenıet jáne sport mınıstri Aqtoty Raıymqulova aıtty, dep habarlaıdy QazAqparat tilshisi.

«Memleket basshysynyń Joldaýyn iske asyrý aıasynda 2020 jylǵy 1 qańtardan bastap mádenıet jáne óner uıymdary qyzmetkerleriniń jalaqysy respýblıkalyq deńgeıde 50 paıyzǵa deıin, óńirlerde 35 paıyzǵa deıin artty. Jalpy, 34 myńǵa jýyq adamnyń jalaqysy ósti. Onyń ishinde respýblıkalyq deńgeıde - 3 myńǵa jýyq adam, óńirlerde - 31 myńnan astam. Bul is-shara qyzmetkerlerdiń shyǵarmashylyq-óndiristik qyzmetiniń sapasy men tıimdiligin arttyrýǵa áser etti, ujymdaǵy áleýmettik-psıhologııalyq jaǵdaıdyń jaqsarýyna, sondaı-aq rýhanı ónim shyǵaratyn qyzmetkerlerdiń shyǵarmashylyq áleýetiniń jandanýyna múmkindik berdi», - dedi mınıstr.

Onyń aıtýynsha, otandyq balet tarıhynda alǵash ret mádenıet uıymynda balet ártisi laýazymynda kásibı qyzmetin toqtatqan kezde keminde 20 jyl kásibı eńbek ótili bolsa, onda sońǵy 3 jyldaǵy ortasha jalaqynyń 60 paıyz mólsherinde arnaıy aı saıynǵy aqshalaı tólem engizildi. Erekshe mártebesi bar mádenıet jáne óner salasyndaǵy joǵary oqý oryndarynyń professor-oqytýshyq quramynyń laýazymdyq jalaqysyna 1,75 koeffıtsıenti saqtaldy.

«2020 jylǵy 1 qańtardan bastap mádenıet jáne sport salasyndaǵy mamandandyrylǵan mektepter men kolledjder qyzmetkerleriniń jalaqysy artty. Ol 2023 jylǵa deıin jyl saıyn 25 paıyzǵa ósetin bolady», - dedi Aqtoty Raıymqulova.

Mınıstrdiń dereginshe, Qazaqstanda ádebıet jáne óner qaıratkerlerine, talantty jastarǵa memlekettik qoldaýdy kúsheıtý maqsatynda QR Tuńǵysh Prezıdenti – Elbasynyń mádenıet salasyndaǵy stıpendııasy jylyna 240-tan 660 aılyq eseptik kórsetkishke deıin ulǵaıtyldy. 2020 jyly 75 mádenıet jáne óner qaıratkeri memlekettik stıpendııa laýreattary atandy. Memleket basshysy 2020 jyly Abaı atyndaǵy Ádebıet pen óner salasyndaǵy Qazaqstan Respýblıkasynyń Memlekettik syılyǵyn 7 ádebıet jáne óner qaıratkerine berdi. Sonymen qatar 2020 jyly alǵash ret memlekettik áleýmettik tapsyrys aıasynda shyǵarmashylyq odaqtardy qoldaýǵa 138,5 mln teńge bólindi.


Joǵary qaraı