Aýa raıy
Astana -18 °S
Almaty 1 °S
valıýta baǵamy
USD 421.58
EUR 496.83
RUB 5.53
CNY 62.20

Aqtóbedegi etnomádenı birlestik ókilderi qaıyrymdylyq aktsııasyn uıymdastyrdy

2021 jyldyń 2 naýryz 2021 05:36

AQTÓBE. QazAqparat – Alǵys aıtý kúni Aqtóbedegi etnomádenı birlestik ókilderi qaıyrymdylyq aktsııasyn uıymdastyrdy, dep habarlaıdy QazAqparat tilshisi oblys ákiminiń baspasóz qyzmetine silteme jasap.

Oblys ákimi Ońdasyn Orazalın Qazaqstan halqy Assambleıasy úıinde ótken «Qazaq eline myń taǵzym!» atty saltanatty sharaǵa qatysty. Aqtóbelikterdi quttyqtaǵan óńir basshysy Alǵys aıtý kúni barlyq qazaqstandyqtardyń bir-birine degen meıirimdilik, dostyq jáne qurmet nyshanyna aınalǵanyn atap ótti.




«Qıyn-qystaý kezeńderde halqymyzdyń qonaqjaılylyq, adamgershilik jáne janashyrlyq syndy eń asyl qasıetteri esimizde. Ata-babamyzdyń meıirimdiligi joǵalǵan joq. Bizdiń oblysta barlyq etnıkalyq toptyń ókilderi ár ulttyń tilin, mádenıeti men dástúrin qurmetteı otyryp, beıbitshilik pen kelisimde ómir súrýde. Ultaralyq kelisimdi qamtamasyz etýde etnomádenı birlestikter jumys jasaıtyn Qazaqstan halqy assambleıasynyń mańyzy zor. Jerlesterimizdiń jalǵyz alǵys aıtýmen shektelip qalmaıtynyna senimdimin. Óıtkeni Otannyń ıgiligi jolyndaǵy kúndelikti jemisti eńbek - rızashylyqtyń eń jaqsy kórsetkishi. Táýelsizdiktiń 30 jyldyǵynda Prezıdent Qasym-Jomart Toqaevtyń bastamasymen «Igi ister marafony» atty jalpyulttyq aktsııa bastaý alǵan bolatyn. Aqtóbelikter memleket basshysynyń bastamasyn qoldap, osy mańyzdy jumysqa kirisip ketti. Bizdiń óńirde etnıkalyq toptardyń arasynda metsenattar men áleýmettik jaǵynan jaýapty kásipkerler kóp. Olar úndeýdi qabyldap, qaıyrymdylyq marafonyna belsendi qatysady dep senemin.

Biz osyndaı jobalardy birlese júzege asyra otyra taǵy da ózimizdiń yntymaǵymyz ben birligimizdi kórsetemiz»,- dedi óńir basshysy. Keıin pandemııa kezinde aldyńǵy qatarda júrgen dárigerlerge, muǵalimderge, polıtseılerge, eriktilerge rıshalyǵyn bildirdi. Ońdasyn Orazalın qoǵamdyq jáne jalpyulttyq yntymaqtastyqty nyǵaıtýǵa úles qosqan aqtóbelikterge alǵys hat tabys etti. Olardyń qatarynda Aqtóbe qalasyndaǵy ​ «Ázerbaıjan qaýymdastyǵy» RQB múshesi, «Babek-Qurylys» JShS basshysy Rahıb Azızov, Qazaqstan halqy assambleıasynyń kásipkerler qaýymdastyǵy múshesi Anatolıı Sımonov, Qazaqstan halqy assambleıasy janyndaǵy qoǵamdyq kelisim keńesi tóraǵasy Sergeı Vıshnıak, «Qaıyrymdy jandar» eriktiler tobynyń múshesi Jeńis Nurjigit bar.




Budan ózge, etnomádenı birlestikterdiń atynan «Qoǵamdyq kelisim» KMK qyzmetkeri Sezgúl Qalıevaǵa 100 myń teńgeniń sertıfıkaty, «Dınar-Elektromash» JShS atynan túrli ult ókilderinen 18 bala asyrap alǵan Jetesovter januıasyna 350 myń teńgeniń sertıfıkaty tabystaldy. «Ázerbaıjan qaýymdastyǵy» RQB jastar qanaty kópbalaly ana Aısulý Kózdibaevaǵa 2 mln teńgeniń sertıfıkatyn berdi. Bul qarajat úıdi kúrdeli jóndeýge jáne jıhaz satyp alýǵa jumsalady.








Joǵary qaraı