Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Aqtóbe qalasy ákiminiń orynbasary jemqorlyǵy úshin 7 jylǵa sottaldy

2021 jyldyń 17 maýsym 2021 18:33

AQTÓBE. QazAqparat – Aqtóbe qalasy ákiminiń orynbasary Jangeldi Áýbákirov jáne qalalyq turǵyn úı-kommýnaldyq sharýashylyq bólimi basshysynyń mindetin atqarýshy Nurlan Dosov 7 jylǵa bas bostandyǵynan aıyryldy, dep habarlaıdy QazAqparat tilshisi.

Aqtóbe qalalyq № 2 sotynda qala ákiminiń orynbasary Jangeldi Áýbákirov, qalalyq turǵyn úı – kommýnaldyq sharýashylyq bólimi basshysynyń mindetin atqarýshy Nurlan Dosov, merdiger mekeme basshysy S.Janasbaev, bas esepshi D.Dúısembı, jeke kásipker N.Mustafınge qatysty qylmystyq isti qarady.

Olarǵa Qylmystyq kodekstiń «Bılikti nemese laýazymdyq ókilettikterdi asyra paıdalaný» baby boıynsha aıyp taǵyldy.

Іs materıalyna súıensek, 2019 jyly qarasha aıynda Aqtóbe qalasy ákiminiń orynbasary J.Ábýbákirov jáne qalalyq turǵyn úı-kommýnaldyq sharýashylyq bólimi basshysynyń mindetin atqarýshy Nurlan Dosovqa ózi tańdap alǵan «KDS-Astana» JShS-men qalany jańa jyldyq bezendirýge memlekettik satyp alý týraly shart jasaýǵa jáne oryndalǵan jumys aktisine qol qoıýǵa nusqaý bergen.

Dosov zańsyz nusqaýlardy oryndap, seriktestik shotyna 100 mln teńge aýdarǵan.

«KDS-Astana» JShS basshysy S.Janasbaev pen bas býhgalteri D.Dúısembı óz tarapynan Dosovqa shartqa jáne oryndalǵan jumystar aktisine qol qoıýǵa járdemdesken.

Qarjyny qolma-qol aqshaǵa aınaldyrý maqsatynda S.Janasbaev «Mýstafın N.K» jeke kásipkerimen birge qalany bezendirý úshin taýar jetkizýge shart jasap, 60 mln teńge aýdarǵan.

Taýar jetkizilmegen. Qylmys saldarynan memleketke 90 426 475 teńge zalal keldi.

«Sot N.Dosov pen J.Ábýbákirovtiń kásibı antty buzýyn jazasyn aýyrlatatyn mán-jaı retinde tanydy. Janasbaev, Dúısembı jáne Mustafınge qatysty aıyptaý aktisinde aýyrlatatyn mán-jaılar kórsetilmegen. Sot óz bastamasy boıynsha olardy anyqtaýǵa quqyly emes. Zańnyń aıtylǵan talaptaryn negizge ala otyryp, kelgen zııannyń ótelmegenin eskerip, sot Dosov pen Ábýbákirovti 7 jylǵa, Janasbaev pen Mustafındi 5 jylǵa bas bostandyǵynan aıyrý jazasyn taǵaıyndady. Dúısembıge 6 jylǵa bas bostandyǵynan aıyrý jazasyn taǵaıyndady. Onyń jas balasy bolýyna baılanysty jazasyn óteýdi 5 jylǵa keıinge qaldyrdy. Úkim zańdy kúshine engen joq», - dedi Aqtóbe qalalyq № 2 sotynyń baspasóz qyzmeti.


Joǵary qaraı