Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Aqmolada taksı júrgizýshisin qaraqshylyqpen óltirgender 18 jylǵa sottaldy

2021 jyldyń 20 qazan 2021 16:30

KÓKShETAÝ. QazAqparat - Aqmola oblysynyń Qylmystyq ister jónindegi mamandandyrylǵan aýdanaralyq sottynda taksı júrgizýshisine qaraqshylyq shabýyl jasap, óltirip jáne kóligin ıemdengen (Qylmystyq kodekstiń 192 babynyń 2 bóligi 1 tarmaǵy, 200 babynyń 2 bóligi 1 tarmaǵy, 9 babynyń 2 bóligi 3,7,10 tarmaqtary) Býrabaı aýdanynyń eki turǵynyna qatysty sot úkimi shyqty, dep habarlaıdy QazAqparat tilshisi oblystyq sottyń baspasóz qyzmetine silteme jasap.

Sot úkimimen sottalýshylardyń árqaısy qaýipsizdigi barynsha joǵary qylmystyq-atqarý júıesi mekemelerinde jazasyn óteı otyryp, 18 jylǵa bas bostandyǵynan aıyryldy.

Sondaı-aq olarǵa alkogolızmnen májbúrlep emdeý túrindegi jaza taǵaıyndaldy.

Sot jábirlenýshilerdiń sottalǵandar R. jáne G-ǵa materıaldyq zalaldy jáne moraldyq zııandy óteý týraly azamattyq talap-aryzyn qanaǵattandyryp, zardap shekken taraptyń paıdasyna sottalǵandardan ortaq tártippen 10 000 000 teńge óndirip aldy.

«Aqmola oblysy Býrabaı aýdanynyń turǵyndary, jumys istemeıtin 22 jastaǵy R. men kolledjdiń 21 jastaǵy stýdenti G. bıylǵy mamyr aıynda mas kúıinde taksı júrgizýshisine qaraqshylyq shabýyl jasap, odan aqsha urlaý maqsatynda onyń uıaly telefonyn, avtokóligin ıemdenip, óz qylmysyn jasyrý maqsatynda taksı júrgizýshisin óltirgen. Júrgizýshini krossovkanyń baýymen tunshyqtyryp, moıny men keýdesin synǵan shyny bótelkeniń ótkir jıekterimen soqqan. Sodan keıin kúdiktiler kólikti bos jerge tastap, qylmys ornynan qashyp ketti», - dedi vedomstvodan.


Avtor Aslan Ospanov
Basty sózder: Oqıǵa, Sot, Zań, Aqmola oblysy,
Joǵary qaraı