Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Aqmola oblysynda «Uly dala jastary» forýmy ótti

2021 jyldyń 30 qarasha 2021 13:30

KÓKShETAÝ. QazAqparat - Aqmola oblysynyń Jaqsy aýdanynda Qazaqstan Respýblıkasynyń Tuńǵysh Prezıdenti Kúnin merekeleý qarsańynda «Uly dala jastary» 5-shi jastar forýmy ótti, dep habarlaıdy QazAqparat tilshisi oblystyq saıasat basqarmasyna silteme jasap.

Sharaǵa oblystyq jastar resýrstyq ortalyǵynyń basshysy Mánsııa Esekeeva, jastar uıymdarynyń kóshbasshylary, Táýelsizdiktiń qurdastary, sportshylar, eriktiler men talantty jastar qatysty.

Qatysýshylardy quttyqtaǵan aýdan ákimi Almagúl Qadyralına forýmdy ótkizýdiń mańyzdylyǵyn atap ótti.

«Bul kúni biz elimizdiń Tuńǵysh Prezıdenti Nursultan Ábishuly Nazarbaevtyń maqsattaryna qol jetkizýdegi strategııalyq talanty, danalyǵy men tabandylyǵynyń arqasynda memleketimizdiń táýelsizdik tarıhy bastalǵanyn, al álemdik saıasatta «Qazaqstandyq damý joly» degen jańa uǵym paıda bolǵanyn erekshe maqtanyshpen túsinemiz. Elbasynyń óz halqy aldyndaǵy jeke jaýapkershilik faktory elimizdiń basty jetistikteri - birlik, turaqtylyq, ornyqty damýdy aıqyndady», - dep atap ótti aýdan ákimi.

Sonymen birge, forýmda Táýelsizdiktiń qurdastary, jas sportshylar, pedagogtar, jastar birlestikteriniń belsendileri sóz alyp, óz jetistikteriniń tarıhy týraly aıtyp, bolashaqqa arnalǵan josparlary men ıdeıalarymen bólisti.

«Meniń barlyq jetistikterim – Táýelsiz elimizdiń arqasynda. Osy jyldar ishinde biz kóp nársege qol jetkizdik jáne kóptegen shyńdardy baǵyndyrdyq. Men Qazaqstanda týyp, ómir súrgenimdi maqtan tutamyn. Óz jetistikterimmen Otanymyzdy odan ári dáripteýge tyrysamyn», - dep bólisti pankratıonnan álem chempıony, Jańaqıma aýylynyń turǵyny Kóshen Aqanov.

Forým barysynda jastardyń birqatar belsendi ókilderi aýdan ákiminiń alǵys hattarymen marapattaldy. Sondaı-aq aýdan jastaryna arnalǵan qarar qabyldandy.


Joǵary qaraı