Aqmola oblysynda qaraýsyz maldyń kesirinen 40 kólik apaty bolǵan

KÓKShETAÝ. QazAqparat - Aqmola oblysynda avtokólik jolynda baqylaýsyz jaıylyp júrgen maldyń kesirinen jol-kólik oqıǵasy oryn alyp, júrgizýshi aýrýhanaǵa tústi, dep habarlaıdy QazAqparat tilshisi oblystyq Polıtsııa departamentiniń baspasóz qyzmetine silteme jasap.

Vedomstvonyń málimetinshe, óńirdegi avtokólik joldarynyń boıynda baqylaýsyz jaıylyp júrgen maldardyń saldarynan jol-kólik oqıǵalary jıi bolady.

«Máselen, bıylǵy jylǵy qarashanyń 18-de «Zerendi-ýchınsk» avtojolynda «Renault Logan» avtokóliginiń 32 jastaǵy júrgizýshisi jolǵa shyǵyp ketken jylqyny qaǵyp ótken. Jol-kólik oqıǵasy saldarynan júrgizýshi túrli dene jaraqatymen aýrýhanaǵa tústi», - dedi vedomstvodan.

Aıta ketý kerek, kólik quralynyń ıesi materıaldyq zalaldy óteý úshin jol apatyna sebepker janýardyń ıesiniń ústinen azamattyq tártippen sotqa aryz berýine quqysy bar. Jalpy, aǵymdaǵy jyly Aqmola oblysynda qaraýsyz maldyń qatysýymen 40-qa jýyq jol-kólik oqıǵasy tirkelip, 4 adam túrli dárejedegi jaraqat aldy.