Aýa raıy
Astana -19 °S
Almaty -13 °S
valıýta baǵamy
USD 421.58
EUR 496.83
RUB 5.53
CNY 62.20

Aqmola oblysynda ıisshil ıttiń kómegimen 400-ge jýyq qylmys ashyldy

2020 jyldyń 25 qarasha 2020 10:33

KÓKShETAÝ. QazAqparat - Aqmola oblysynda ıisshil ıttiń kómegimen 400-ge jýyq qylmys ashyldy, dep habarlaıdy QazAqparat tilshisi oblystyq PD baspasóz qyzmetine silteme jasap.

Vedomstvonyń málimetinshe, quqyq buzýshyda birde-bir múmkindik qalmaıdy. Ashylǵan qylmystardyń kúndelikti málimetterinde adam ǵana emes, janýarlardyń da jumysy kórsetiledi. Sondyqtan jattyǵý - tórt aıaqty polıtseıler ómiriniń ajyramas bóligi.

Kóbine nysandy qorǵaýdyń senimdiligi, qylmyskerlerdi izdeý, esirtki men jarylǵysh zattardy anyqtaý ıt nusqaýshylarynyń kásibıligine jáne ıttiń daıyndyǵyna baılanysty.

«Kúshikten tórt aıaqty polıtseıdiń ósirý ońaı emes, bul úlken jumys»,- deıdi kishi ınspektor kınolog Almaz Tleýlesov.




Búgingi kúni polıtsııa departamentiniń kınologııalyq qyzmet ortalyǵynda 43 úı janýary bar, onyń 22 iz boıynsha, esirtki quraldaryn izdeý boıynsha – 3, jarylǵysh zat izdeý boıynsha – 3, shabýyl jumysy boıynsha – 2, odorologııa boıynsha – 5 jáne patrýldik bekettik qyzmet boıynsha – 1 ıt.

«Ortalyqta tórt aıaqty polıtseılerge barlyq jaǵdaı qarastyrylǵan: volerler, medıtsınalyq blok, sondaı-aq ártúrli jattyǵý qurylǵylary bar keshen ornalasqan. Biz alty negizgi baǵyt boıynsha jumys isteımiz, – dep túsindirdi Almaz Tleýlesov. – Bul - iz kesý jumystary, jarylǵysh zat, esirtki izdeý jáne tabý, sondaı-aq krımınalıstıkalyq basqarý jelisi boıynsha jumys, ıaǵnı qylmys ornynda alynǵan ıisterdi odorologııalyq irikteý. Sondaı-aq, bizde patrýldik qyzmet kórsetetin kúzet ıtteri bar».

Jalpy, árqaısy ár iske mamandanady. Mysaly, spanıelder jarylǵysh zat pen esirtki izdeýge qabiletti, biraq kúzet qyzmetine onsha qolaıly emes. Nemis ıtteri ámbebap tuqym bolyp sanalady jáne kez kelgen iske jaramdy.

Tek osy jyly qyzmettik-izdestirý ıtiniń kómegimen oblys aýmaǵynda 371 qylmys ashyldy, onyń ishinde 200-den astamy - urlyq. Esirtkiniń zańsyz aınalymyna baılanysty 21 qylmys ashylyp, 4 kılogramnan astam túrli esirtki tárkilendi.

«Ittiń bolýy psıhologııalyq turǵydan shabýyldaýshylarǵa áser etedi, olar polıtseılerge qarsy turýdan nemese qashyp ketýden qorqady. Sondaı-aq, polıtsııanyń qyzmetin edáýir jeńildetetin zamanaýı tehnıkalyq quraldardyń, ártúrli jabdyqtardyń únemi damýyna qaramastan, qylmysty ashýdaǵy qyzmettik ıttiń róli kún sanap artyp keledi», – dep tolyqtyrdy Almaz Tleýlesov.


Avtor Aslan Ospanov
Basty sózder: Zań, Aqmola oblysy, Qylmyspen kúres,
Joǵary qaraı