Aqmola oblysynda eki kólik soqtyǵysyp, 3 adam zardap shekti
KÓKShETAÝ. QazAqparat – Aqmola oblysynda eki kólik soqtyǵysyp, úsh adam zardap shekti. Onyń biri 7 jasar ul bala, dep habarlaıdy QazAqparat tilshisi oblystyq Polıtsııa departamentiniń baspasóz qyzmetine silteme jasap.
Vedomstvonyń málimetinshe, tamyzdyń 4-de Zerendi aýdandyq PB kezekshilik bólimine «Kókshetaý-Omby» tas jolynda jol-kólik oqıǵasy bolǵandyǵy týraly aqparat tústi.
«Tártip saqshylary anyqtaǵandaı, atalmysh joldyń 21 shaqyrymynda 67 jastaǵy er adam basqarǵan «Lada Prıora» kóligi Soltústik Qazaqstan oblysynyń 59 jastaǵy turǵyny otyrǵan tap osyndaı markadaǵy kólikpen soqtyǵysty. Jol apatynan Aqmola oblystyq kópbeıindi aýrýhanasyna eki kóliktiń júrgizýshisi men 7 jastaǵy ul bala túrli dene jaraqatymen jetkizildi», - deıdi vedomstvodan.
Baspasóz qyzmetinen belgili bolǵandaı, qazirgi kezde jol-kólik oqıǵasyna baılanysty QR QK 345 babynyń 2 bóligi boıynsha sotqa deıingi tergeý amaldary júrgizilýde.
Aıta keteıik, atalmysh jol apaty týraly beınejazba áleýmettik jelilerde jarııalanǵan bolatyn.
