Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

ÁMEN anımatsııalyq fılmder festıvali Túrkistanda ótedi

2021 jyldyń 25 qazan 2021 17:11

NUR-SULTAN. QazAqparat – Bıyl dástúrli ÁMEN halyqaralyq anımatsııalyq fılmder kınofestıvali Túrkistan qalasynda ótedi, dep habarlaıdy QazAqparat.

29-30 qazan kúnderi úshinshi ret uıymdastyrylatyn halyqaralyq sharaǵa otandyq jáne baýyrlas túrki elderdiń, atap aıtqanda Túrkııa, Ázerbaıjan, Bashqurtstan, Qyrǵyzstan, Ózbekstan, Tatarstan men Tájikstannyń bilikti mýltıplıkatorlary qatysady.

«Baıqaýǵa anımatsııa salasynda belgili mamandardan qurylǵan halyqaralyq qazylar alqasy tórelik etedi. Jeńimpazdar birneshe nomınatsııa boıynsha marapattalady. Odan bólek, festıval aıasynda sheteldik ozyq mýltıplıkatorlardyń sheberlik synyptary men trenıngteri josparlanǵan. Qatysýshylar álemge tanymal 4 mamannyń dárisin tyńdap, kásibı sheberligin shyńdaýǵa múmkindik alady.

Sondaı-aq, festıval qonaqtary Qazaqstannyń úzdik anımatsııalyq kınostýdııalary kórmesin tamashalaıdy. Onda kınostýdııalar anımatsııa jasaýdyń qyr-syry men erekshelikterin kórsetip, jas mamandar úshin tájirıbe almasý alańyn uıymdastyrady», - dep habarlady festıval uıymdastyrýshylary.

Baǵdarlama boıynsha, festıvaldiń ekinshi kúni túrki elderindegi kıno óneriniń damý baǵyttaryna, búgini men erteńine arnalǵan dóńgelek ústel ótedi. Sheteldik jáne otandyq anımatsııa salasynyń mamandary ózara baılanys ornatyp qana qoımaı, ózekti taqyryptarda pikir almasyp, túrkitildes elderdiń anımatsııa salasyndaǵy yntymaqtastyǵyna jańa serpin bermek.

«Qazaqstan Táýelsizdiginiń 30 jyldyǵyna oraılastyrylǵan festıvaldiń bıyl Túrki dúnıesiniń rýhanı astanasy – Túrkistan qalasynda ótýi de aıryqsha mánge ıe. Uıymdastyrýshylar shahar turǵyndary men qonaqtaryna mereıtoı qarsańynda aıryqsha syı jasamaq. Túrkistandyqtar eki kún qatarynan qaladaǵy eń úzdik kınozaldardan elimizdiń jáne túrki elderiniń eń úzdik anımatsııalyq fılmderin tegin tamashalaıdy», - deıdi uıymdastyrýshylar.

Aıta keteıik, dástúrli festıvaldi OzgeEpic zamanaýı óner keńistigi men Qazaqstan anımatsııalyq kınostýdııalar qaýymdastyǵy Aqparat jáne qoǵamdyq damý mınıstrliginiń qoldaýymen uıymdastyrady.


Joǵary qaraı