Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

8 jylyn qazaq baletine arnaǵan japon balerınasy eline oralmaq

2021 jyldyń 18 maýsym 2021 09:37

NUR-SULTAN. QazAqparat - «Astana Opera» teatrynyń ártisi Marıko Kıtamýra balerına mansabyn aıaqtady. Tokıonyń týmasy otany Japonııaǵa qaıtyp oralmaq. Óz suhbatynda bıshi Qazaqstandaǵy ómiri týraly áserlerimen bólisip, qazaq baletiniń ereksheligi týraly aıtty, sonymen qatar elimizge, týǵan teatryna kórermen retinde kelýge ýáde berdi, dep habarlaıdy «Astana Opera» teatrynyń baspasóz qyzmeti.

- Siz on jylǵa jýyq kásibı qyzmetińizdi qazaq baletine arnadyńyz, elordalyq teatrǵa qalaı keldińiz, elimizben tanystyǵyńyz qalaı bastaldy?

- Bes jyldaı máskeýlik teatrda jumys istedim, 2013 jyly Qazaqstanda Ortalyq Azııadaǵy eń iri teatrlardyń biri ashylady degendi estip, óz baǵym men kúshimdi synaýǵa bel býdym. Óte qatań konkýrstyq irikteý boldy, ártisterdi túrli elden kelgen qazylar músheleri baǵalady, baǵyma oraı, shyǵarmashylyq baıqaýdan súrinbeı ótip, «Astana Opera» trýppasyna qabyldandym.

- Qazaqstan birden unady ma?

- Iá, álbette. Mundaǵy adamdar óte ashyq jarqyn, meıirimdi, nıettes. Balet trýppasymen tanysqan kezde de ózime degen osyndaı qarym-qatynasty sezindim, meni qoldap, kómektesip, árdaıym aqyl-keńesin berýden aıanbaıtyn kóptegen dosym bar.

- Olaı bolsa, nelikten Japonııaǵa oralý týraly sheshim qabyldadyńyz?

- Túsinesizder me, balet ártisiniń ǵumyry qysqa, meniń jasym 36-da, kásibı mansapty toqtatý sáti keldi, sondyqtan Tokıoǵa, saǵyndyrǵan otbasyma oralamyn dep sheshtim. Qyzmet salamdy aýystyrýdy josparlaýdamyn, degenmen balet máńgi-baqı menimen birge, endi tek ózim úshin aınalysamyn. «Astana Opera» teatrynda jumys jasaǵan jyldarym ishinde sahna tórinde jarqyn jeke partııalardy, tórttikterdi, ekilikterdi jasadym, teatrdyń repertýaryndaǵy túgel derlik spektaklderde bıledim. «Shopenıana» romantıkalyq baletindegi Prelıýd aıryqsha esimde, ol óte kúrdeli nómir. Osyndaı mándi de mazmundy mansabym úshin, ásirese, «Jızel», «Don Kıhot» baletterindegi birneshe premeralarym oryn alǵan ózimniń sońǵy teatr maýsymym úshin balet trýppasynyń kórkemdik jetekshisi, Reseıdiń Halyq ártisi Altynaı Asylmuratovaǵa alǵysym sheksiz, men árdaıym onyń qoldaýyn, maǵan degen jyly lebizin sezindim.

- Suhbattaryńyzdyń birinde Siz ata-anańyz árqashan kórermen úshin bıleýiń kerek dep úıretkenin aıtqansyz. «Astana Opera» teatry ashylǵaly Sizdiń óz kórermenderińiz paıda bolǵanyn jaqsy bilemiz.

- Teatrymyzǵa ıgi, jany jaısań jaqsy kórermender keledi, olar únemi ártisterdi qoshemetterimen qoldap otyrady. Sózsiz, kez kelgen ártis zaldan keletin qýatpen jigerlenedi, aramyzda emotsııalarmen almasý júredi desek bolady. Men baletti qatty jaqsy kóremin, sahnaǵa shyqqan kezde ózim úshin de bıleımin, budan zor lázzat alamyn, sebebi árdaıym osyny armandaıtynmyn.




- Qazaqstanda ótkizgen jyldaryńyz ishinde ózińiz úshin qandaı jańa tustardy ashtyńyz?

- Mundaǵy adamdardyń jaıdary ekenin joǵaryda aıtyp óttim. Osynda turyp kele jatqannan beri qazaqtyń dástúrli taǵamdaryna úırendim, óte dámdi et, ásirese, qazy til úıiredi. Bul eldiń salt-dástúri men mádenıeti keremet. Kóp ýaqyt boıy Nur-Sultanda turǵandyqtan, qalanyń ásem sáýletin atap óte alamyn, ol álemdik astanalardan esh kem túspeıdi. Demalys kúnderi dostarymyzben jap-jasyl saıabaqtar men gúl baqtarynda jıi qydyratynbyz, munda bári de janǵa jaıly, qolaıly, bári de keremet oılastyrylǵan. Bir jaǵynan, qazaq mentalıtetine, mádenıetine sińisip kettim, osy elmen qoshtasý kóńilimde muńly sezim týdyrady. Arqamda jaýapkershilik júgi baryn sezinemin, sebebi mádenı ómir meniń esimimmen de baılanysty: «Astana Opera» teatrynyń ashylýyna qatystym, munda maǵan arnap tigilgen kostıýmder de bar. Zor alǵys sezimimen ketip baramyn, sebebi dál osy Qazaqstanda álemdik ataǵy bar qoıýshy horeograftarmen jumys isteý múmkindigi týdy. Ashylǵan sátinen bastap teatr aýqymdy is tyndyrdy, basqa trýppalarda men daıyn repertýardy bıleıtinmin, al munda balettiń tuńǵıyǵyna tereńirek boılaýǵa, spektakl jasalýynyń qyr-syryn úırenýge múmkindik berildi, osynyń arqasynda balettiń dúnıege kelýi týraly pikirim túbegeıli ózgerdi, bul orasan zor eńbek. Kóz aldymda «Astana Opera» teatry Qazaqstan mádenıetiniń betke ustaryna aınaldy, osy tarıhtyń bir bólshegi bolǵanym úshin ózimdi baqytty sezinemin. Endigi kezekte teatrǵa kórermen retinde oralý josparymda bar, al eger trýppa gastroldik saparmen Japonııaǵa at basyn bursa, mindetti túrde syılyqtarymmen baramyn.

«Astana Opera» teatrynyń dırektsııasy, balet trýppasynyń kórkemdik jetekshisi Altynaı Asylmuratova balet ártisi Marıko Kıtamýraǵa Úlken zal sahnasynda somdaǵan beıneler galereıasy úshin, qajyrly da qaıratty eńbegi men jumysqa degen minsiz qarym-qatynasy úshin sheksiz alǵysyn bildirdi. Basshylyq ártistiń jańa bastamalaryna sáttilik, myqty densaýlyq tilep, teatrdyń esigi Marıko Kıtamýra úshin árdaıym aıqara ashyq ekenin aıtty.





Basty sózder: Nur-Sultan, Mádenıet, Óner,
Joǵary qaraı