Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

6 aıda múgedektigi bar adamdardyń quqyǵy 1,9 myń ret buzylǵan

2021 jyldyń 26 shilde 2021 10:26

NUR-SULTAN. QazAqparat - 2021 jyldyń 6 aıynda Eńbek, áleýmettik qorǵaý jáne kóshi-qon komıtetiniń óńirlik departamentteri júrgizgen tekserý barysynda áleýmettik ınfraqurylymnyń 379 nysanynda QR «Múgedekterdi áleýmettik qorǵaý týraly» jáne «Arnaýly áleýmettik qyzmetter týraly» zańdaryn 1918 ret buzý deregi anyqtaldy, dep habarlaıdy QazAqparat.

Birinshi jartyjyldyqta memlekettik basqarý, densaýlyq saqtaý, mádenıet jáne kóliktik qyzmet kórsetý salalaryndaǵy nysandarda zańbuzýshylyqtardy anyqtaý boıynsha, onyń ishinde múgedektigi bar adamdar úshin qoljetimdi ortany qamtamasyz etý turǵysynan 469 baqylaý is-sharasy ótkizildi. Osy oraıda 312 tekseris josparly aldyn alý-baqylaý aıasynda jáne 157-si azamattardyń ótinishteri negizinde jospardan tys júrgizildi.

Tekserý qorytyndysy boıynsha QR «Múgedekterdi áleýmettik qorǵaý týraly» zańynyń 1603 buzylýy jáne «Arnaýly áleýmettik qyzmetter týraly» zańynyń 315 buzylýy anyqtaldy.

Bul rette 1,5 myńnan astam zańbuzýshylyq múgedekterdiń áleýmettik jáne kólik ınfraqurylymy nysandaryna, mádenı-oıyn-saýyq uıymdary men sport ǵımarattaryna kirip-shyǵýyn qamtamasyz etpeýmen baılanysty bolyp otyr.

Tekserýler nátıjesinde múgedektigi bar adamdardy áleýmettik qorǵaý jáne olarǵa arnaýly áleýmettik qyzmet kórsetý salasynda anyqtalǵan zańbuzýshylyqtardy joıýǵa 379 nusqama berildi, olardyń 71-i boıynsha jalpy somasy 7,4 mln teńgege ákimshilik aıyppul salyndy.


Joǵary qaraı