Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

2025 jylǵa deıin Túrkistanda 26,5 myń páter salynady – Aıdos Úkibaı

2021 jyldyń 13 mamyr 2021 20:11

NUR-SULTAN. QazAqparat – «Skeptıkter mańyzdy faktordy eskermegen edi: Nursultan Nazarbaev bastalǵan isin árdaıym aıaǵyna deıin jetkizedi. Elbasy Nursultan Nazarbaevtyń Túrkistanǵa sapary týraly oı-tolǵamymen bólisken Tuńǵysh Prezıdenttiń baspasóz hatshysy Aıdos Úkibaı osylaı dedi, dep habarlaıdy QazAqparat tilshisi.

«Elbasynyń bul jobasy, ózi atap ótkendeı, táýelsizdigimizdiń bastapqy kezeńinde-aq josparlanǵan bolatyn. Nursultan Nazarbaev Elordanyń 20 jyldyǵyn ótkerip, Qazaqstannyń rýhanı astanasyn jańǵyrtýǵa kirisý týraly kezekti strategııalyq turǵydan durys sheshim qabyldaǵan bolatyn. Sol úshin 2018 jyly Túrkistan oblysyn qurý jáne oblys ortalyǵyn Túrkistanǵa kóshirý týraly tarıhı Jarlyqqa qol qoıylǵan kúni Qazaqstannyń Tuńǵysh Prezıdenti keńes ótkizip, onda ulttyq kompanııa basshylary men iri bıznes ókilderin qalanyń qurylysyna belsendi qatysýǵa shaqyrdy», - dep eske alady Elbasynyń baspasóz hatshysy.

Aıdos Úkibaı bul jobaǵa da áýel basta kúdikpen qaraıtyndar bolǵanyn aıtady.

«Árıne, Elbasy ıdeıasyna kúmánmen qaraıtyndar da boldy. Biraq, 1994 jyly da saıasatkerlerdiń kópshiligi Qazaqstannyń astanasyn kóshirý jáne jańasyn turǵyzý ıdeıasyna kúmánmen qaraǵany esimizde. Alaıda skeptıkter myna bir mańyzdy faktordy eskermegen edi: Nursultan Nazarbaev bastalǵan isti árdaıym aıaǵyna deıin jetkizedi», - deıdi Tuńǵysh Prezıdenttiń baspasóz hatshysy.

Ol, sondaı-aq, úsh jyldyń ishinde Túrkistannyń qarqyndy damyǵanyn kórip ınvestorlar men otandyq bıznesmender tarapynan qala aýmaǵynda túrli jobalardy iske asyrý týraly usynystar molynan túsip jatqanyn jetkizedi. Jergilikti kásipkerlerdiń óz bıznesterin keńeıtý úshin kóbirek jer surap jatýy óńirdiń jarqyn bolashaǵynan habar beretin belgi ekenin aıtady.

«Nursultan Ábishuly Túrkistannyń jańǵyrýy – tek ásem de aıbyndy nysandar ǵana emes, eń aldymen, óńir turǵyndarynyń jáne barsha qazaqstandyqtardyń ál-aýqatyn arttyrý ekenin únemi atap ótti. Sondyqtan ekinshi kezeńde óńirde densaýlyq saqtaý, bilim berý, energetıka, ónerkásip jáne ınfraqurylymdyq damý salasyndaǵy jobalar (óńirdi damytý josparynyń 140-tan astam is-sharasy) iske asyrylatyn bolady. Keshendi damýdyń ekinshi kezeńin iske asyrý sheńberinde jyl saıyn 40 myń jumys orny qurylatyn bolady. 2025 jylǵa deıin 1,4 mıllıon sharshy metr turǵyn úı nemese 26,5 myń páter salý jáne paıdalanýǵa berý josparlanýda», - dedi ol.

Tuńǵysh Prezıdenttiń baspasóz hatshysy atalǵan nátıjelerge Elbasynyń saıası erik-jigeriniń, qajyrly eńbeginiń jáne jeke qatysýynyń arqasynda qol jetkizilgenin, Memleket basshysy Qasym-Jomart Toqaev ta Túrkistannyń qaıta túrlenýine erekshe mán berip otyrǵanyn atap ótedi.

«Qala men aımaqty damytýda jergilikti ákimdik pen Úkimetke úlken jaýapkershilik júktelgen. Olar Tuńǵysh Prezıdent bekitken tujyrymdama men josparlardy naqty jáne ýaqtyly júzege asyryp otyr. Premer-Mınıstr bastaǵan Úkimettiń úılesimdi komandalyq jumysy pandemııa jaǵdaıynda da barlyq qaýipsizdik sharalaryn eskere otyryp, mańyzdy áleýmettik-mádenı nysandardyń qurylysyn jalǵastyrýǵa múmkindik berdi. Túrkistan men Túrkistan oblysy árbir kezekti saparmen bizdi jańa jetistiktermen tańǵaldyratynyna senimdimin», - degen A.Úkibaı oı-tolǵamyn Nursultan Nazarbaevtyń sózimen túıindedi:

«Búgin biz buryn tipti armandaı almaǵan isti júzege asyryp jatyrmyz. Buǵan qýanýymyz kerek. Bul jetistigimizdi Táýelsizdiktiń 30 jyldyǵyna arnaımyz. Biz táýelsiz Qazaqstandy damytyp, ata-babalarymyzdyń armanyn júzege asyryp otyrmyz. Birligimiz aldaǵy ýaqytta da nyǵaıa bersin. Tek judyryqtaı jumylý arqyly ǵana jolymyzdaǵy qıyndyqtardyń bárin jeńemiz».


Joǵary qaraı