Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

2022 jyldan bastap 1 synyp oqýshylaryna «Tsıfrlyq saýattylyq» páni engiziledi

2021 jyldyń 12 qazan 2021 12:26

NUR-CULTAN. QazAqparat - 2022 jyldyń qańtar aıynan bastap birinshi synyp oqýshylaryna «Tsıfrlyq saýattylyq» páni engiziledi. Bul týraly QazAqparat Bilim mınıstrligine silteme jasap habarlaıdy.

Buǵan deıin oqýshylar úshinshi synyptan bastap «Aqparattyq-kommýnıkatsııalyq tehnologııalar» pánin oqyǵan bolatyn.

«Oqý baǵdarlamasy suranys pen ýaqyt talaptaryna sáıkes bolýy tıis. Búgingi tańda tsıfrlyq álemniń qarqyndy damyp jatqanyn kórip otyrmyz. Qazir smartfondar men kompıýterlerdi mektepke deıingi kishi jastaǵy balalar paıdalanyp jatady. Tsıfrlyq saýattylyq – oqý men jazý sııaqty negizgi daǵdylardyń birine aınalyp keledi. Sondyqtan balalardy tsıfrlyq saýattylyq jáne aqparattyq qaýipsizdik negizderine múmkindiginshe erterek úıretý mańyzdy. Álbette, jańa pándi oqytý barysynda balalardyń jas erekshelikteri de eskeriletin bolady», – dep atap ótti QR BǴM Mektepke deıingi jáne orta bilim komıtetiniń tóraǵasy Gúlmıra Kárimova.

Sonymen qatar 4-synypqa arnalǵan «Aqparattyq-kommýnıkatsııalyq tehnologııalar» jáne 5-11 synyptarǵa arnalǵan «Informatıka» pánderi boıynsha oqý baǵdarlamalary qaıta qaraldy. Jańashyldyqtar balalardyń aqparattyq tehnologııalar salasynda sapaly bilim alýyna baǵyttalǵan.

Mektep baǵdarlamasy sheńberinde eń tanymal Python baǵdarlamalaý tili oqytylady. Sondaı-aq 5-9 synyp oqýshylary 3D-modeldeý men 3D-prıntıngke boıynsha bilim alady.

10-11 synyptardaǵy «Informatıka» páni boıynsha úlgilik oqý baǵdarlamasy IT-salasynyń zamanaýı damý úrdisterin eskere otyryp ázirlengen. Oqytý baǵdarlamasynda IT-STARTUP, vırtýaldy jáne tolyqtyrylǵan shynaıylyq, jasandy ıntellekt, mobıldi qosymshalardy ázirleý, BigData jáne taǵy basqa taqyryptar bar. Sondaı-aq barlyq synyptyń oqý baǵdarlamalaryna Internet jelisindegi qaýipsizdik erejeleri, avtorlyq quqyq týraly taqyryptar engizilgen.


Joǵary qaraı