Aýa raıy
Astana -7 °S
Almaty 4 °S
valıýta baǵamy
USD 421.58
EUR 496.83
RUB 5.53
CNY 62.20

2021 jyly Ulttyq qordan 1 trln teńge mólsherinde nysanaly transfert tartylmaq

2020 jyldyń 21 qazan 2020 12:40

NUR-SULTAN. QazAqparat –Parlament Májilisiniń jalpy otyrysynda Ulttyq ekonomıka mınıstri Rýslan Dálenov 2021 jyly Ulttyq qordan 1 trln teńge mólsherinde nysanaly transfertti tartý usynysyn aıtty, dep habarlaıdy QazAqparat tilshisi.

«Áleýmettik-ekonomıkalyq saıasattyń negizgi basymdyqtary ınvestıtsııalyq jáne bıznes ahýaldy jaqsartý, sapaly adamı kapıtal jáne teńgerimdi óńirlik damý bolady», - dep toqtaldy mınıstr.

2021-2023 jyldarǵa arnalǵan úshjyldyq bıýdjetti qalyptastyrý kezinde kelesi boljamdy parametrler qoldanyldy:

1) Jalpy ishki ónimniń 2021 jyly 2,8%, 2022 jyly 3,7% jáne 2023 jyly 4,6 paıyzdyq naqty ósýi.

2) 2021-2022 jyldary ınflıatsııa 4-6% jáne 2023 jyly 4-5%.

3) Munaı óndirý kóleminiń 2021 jyly 86 mln tonna, 2022 jyly 89,6 mln tonna jáne 2023 jyly 100,8 mln tonna deńgeıinde bolýy.

4) Konservatıvti tásildi eskere otyryp, 2021-2023 jyldary munaı baǵasy bir barreline 35 dollar deńgeıinde alyndy.

«Osy makroekonomıkalyq kórsetkishter negizinde kelesi bıýdjet parametrleriniń boljamy qalyptasty. Respýblıkalyq bıýdjettiń kiristeri (transfertterdi esepke almaǵanda) 2021 jyly- 6 trln 926 mlrd teńgeni, 2022 jyly - 8 trln 566 mlrd teńgeni, 2023 jyly 9 trln 217 mlrd teńgeni quraıdy», - dep naqtylady R. Dálenov.

Kepildendirilgen transfertti 2021 jyly – 2 trln 700 mlrd teńge, 2022 jyly – 2 trln 400 mlrd teńge jáne 2023 jyly – 2 trln 200 mlrd teńge mólsherinde aıqyndaý usynylady.

«Damý baǵdarlamalaryn qarjylandyrýdy ulǵaıtý úshin 2021 jyly Ulttyq qordan 1 trln teńge mólsherinde nysanaly transfertti tartý usynylady. Osylaısha, boljam boıynsha túsimder 2021 jyly 11,4 trln teńge, 2022 jyly – 11,8 trln teńge, 2023 jyly 12 trln teńgeni quraıdy», - dedi vedomstvo basshysy.

Respýblıkalyq bıýdjettiń shyǵystary 2021 jyly 14 trln 049 mlrd teńge, 2022 jyly 13 trln 873 mlrd teńge, 2023 jyly 13 trln 889 mlrd teńge kóleminde boljanýda.

«Jalpy, áleýmettik-ekonomıkalyq damý boljamy makroekonomıkalyq turaqtylyqty saqtaýǵa jáne nátıjeli jumyspen qamtýǵa, sonymen qatar ulttyq ekonomıkany turaqty jáne sapaly damytýǵa baǵyttalǵan», - dedi Rýslan Dálenov.


Avtor Rýslan Ǵabbasov
Basty sózder: Parlament, Ekonomıka, Qarjy,
Joǵary qaraı