Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

2021 jyly Prezıdenttiń qandaı áleýmettik bastamalary júzege asty

2021 jyldyń 30 jeltoqsan 2021 12:10

NUR-SULTAN. QazAqparat – QR Prezıdentiniń kómekshisi Erlan Qarın 2021 jyly Memleket basshysynyń qandaı áleýmettik bastamalary júzege asyrylǵanyna sholý jasady, dep habarlaıdy QazAqparat tilshisi.

«Bıyl qazaqstandyqtardyń ál-aýqatyn arttyrýǵa baǵyttalǵan birqatar prezıdenttik bastama júzege asyryldy. Olardyń tıimdiligin azamattaryń túrli sanatyndaǵy ókilderi naqty sezindi. Bastamalardyń basym bóligin Memleket basshysy Ulttyq qoǵamdyq senim keńesiniń alańynda usynǵan bolatyn», - dep jazdy QR Prezıdentiniń kómekshisi Telegram kanalynda.

Sonymen Memleket basshysynyń bıyl júzege asyrylǵan áleýmettik bastamalary mynalar:

• Zeınetaqy jınaǵynyń jetkiliktilik sheginen asatyn bóligin merziminen buryn sheshý alý tetigi engizildi. Jarty mıllıonnan astam adam artyq qarajattaryn zeınetaqy qorynan alyp, turǵyn úı jaǵdaıyn jaqsartty.

• Alǵash ret joǵary oqý ornyna qabyldaý kvotasy aıasynda áleýmettik az qamtylǵan azamattarǵa jańa úsh baǵytta memlekettik bilim granttary taǵaıyndaldy. Nátıjesinde kópbalaly otbasydan, tolyq emes otbasydan, sonymen qatar múgedek bala tárbıelep otyrǵan otbasydan shyqqan 5 myńnan astam talapker granta ıe boldy.

• Erekesh bilim berý qajettiligi bar balalardy oqytýǵa arnalǵan qarjylandyrýdyń jan basyna shaqqandaǵy normatıvi arttyryldy.

• Oqýshylar jan basyna qarjylandyrý arqyly memlekettik tapsyrystyń engizilýiniń arqasynda shyǵarmashylyq úıirmeler men sport sektsııalaryna tegin barý múmkindigin aldy.

• «Ańsaǵan sábı» arnaýly baǵdarlamasy iske qosyldy. Onyń aıasynda jyl saıyn asandy jolmen uryqtandyrýǵa 7 myń kvtota bólinedi.

• Elimizdiń 6 óńirinde múgedektikti belgileý boıynsha proaktıvti syrttaı qyzmet kórsetý ilki jobasy júzege asyryldy. 2021 jyldyń jeltoqsanynda bul tájirıbe búkil elimizge taratyldy.

• «Tabaldyryqtan tabaldyryqqa deıin prıntsıpimen» múgedektigi bar tulǵalar jáne ózge de qozǵalysy shekteýli azamattar úshin kedergisiz qoljetimdilikti qamtamasyz etý boıynsha is-sharalar qabyldandy. Suranysy joǵary nysandardyń kartasy ázirlendi. Karta qozǵalysy shekteýli azamattarǵa olardyń qoljetimdiligin turaqty monıtorıngileýge jáne memlekettik baqylaýdy júzege asyrýǵa múmkindik beredi.

• 2021 jyldyń qańtarynan pedagogıkalyq qyzmetkerlerdiń jalaqysy 25 paıyzǵa ulǵaıtyldy.

• Prezıdent qyrkúıektegi Joldaýynda mádenıet, muraǵat, kitaphana salasy qyzmetkerleriniń, tehnıkalyq jumysshylardyń, qoryqshylardyń, júrgizýshilerdiń jáne basqa qyzmetkerlerdiń jalaqysyn kóterýdi tapsyrdy. Bul sanatqa kiretin jumysshylardyń jalaqysy 2022 jyldan 2025 jylǵa deıin jyl saıyn ortasha eseppen 20 paıyzǵa artyp otyrady.

• 2022 jylan bastap eń tómengi jalaqy mólsheri 40 paıyzǵa, 42 500 teńgeden 60 myń teńgege artady. Bul is-shara qalaı bolǵanda da jumys isteıtin barlyq qazaqstandyqqa qatysty bolady.

• Polıtsııanyń jáne quqyq qorǵaý organdarynyń jedel tergeý bólimsheleriniń halyqpen jumys isteýge arnalǵan barlyq qyzmettik oryn-jaılarynda tolyqtaı beınebaqylaý engizildi. Bul olardyń qyzmetiniń ashyqtyǵyn arttyrýǵa múmkindik beredi. Sonymen qatar Іshki ister mınıstriginiń qurylymynda áıelder men balalardy zorlyq-zombylyqtan qorǵaý arnaýly bólimshesi qaıta ashylyp, shtaty keńeıtildi.

«Jáne de bul azamattardyń ómir sapasyn ret-retimen arttyratyn ózgeristerdiń bir parasy ǵana. Prezıdent áleýmettik mańyzy bar máselelerge basa nazar aýdaryp, olardy sheshý úshin naqty is-sharalar men qadamdarǵa bastamashylyq jasaıdy. «Adam memleket úshin emes, memleket adam úshin» prıntsıpi elimizde júrgizilip jatqan reformalardyń, sonymen qatar búkil memlekettik saıasattyń aıasynda saqtalady», - dedi Erlan Qarın.


Joǵary qaraı