Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

2021 jyly Prezıdent qandaı saıası reformalardy iske asyrdy

2021 jyldyń 29 jeltoqsan 2021 11:36

NUR-SULTAN. QazAqparat – QR Prezıdentiniń kómekshisi Erlan Qarın Memleket basshysy Qasym-Jomart Toqaevtyń jyl boıy iske asyrǵan reformalaryna sholý jasady, dep habarlaıdy QazAqparat tilshisi.

«2021 jyl elimiz úshin kezekti reformalar jyly boldy. Áýel bastan saıası blok pen quqyq qorǵaý problematıkasy qarqyndy ózgeristerdiń salasyna aınaldy», - dep jazdy ol Telegram-kanalynda.

Erlan Qarınniń aıtýyna qaraǵanda, jyl ishinde atalǵan salalarda mynadaı mańyzdy sapalyq ózgerister iske asqan:

1) Mamyr aıynda Prezıdent saıası partııalar úshin Májiliske ótý shegin 7-den 5%-ǵa deıin tómendetýdi kózdeıtin zańǵa qol qoıdy.

2) Bul zań barlyq deńgeıdegi saılaý bıýlletenderinde «Bárine qarsymyn» degen baǵandy bekitti.

3) Maýsym aıynda Prezıdenttiń arnaıy jarlyǵy boıynsha Úkimet adam quqyqtary salasyndaǵy birinshi kezektegi sharalar josparyn bekitti. Ol adam saýdasy qurbandarynyń, múgedek adamdardyń quqyqtaryn qamtamasyz etýge, qylmystyq sot tóreligi salasynda adam quqyqtaryn qamtamasyz etýge, azaptaýlar men qatygez qarym-qatynastyń aldyn alýǵa jáne t. b. baǵyttalǵan pármendi sharalardyń keń jıyntyǵyn qamtıdy.

4) 25 shildede Qazaqstanda alǵash ret aýyldyq okrýg ákimderiniń tikeleı saılaýy ótti. Ótken saılaýdyń nátıjesinde aýyl ákimderiniń korpýsy 50%-dan astam jańardy.

5) Qyrkúıek aıynda Prezıdent kezekti Joldaýynda depýtattyq mandattardy bólý kezinde áıelder men jastar úshin 30 paıyzdyq kvotany zańnamalyq túrde bekitýdi usyndy. Memleket basshysy erekshe muqtajdyqtary bar adamdardy qosa otyryp, partııalardyń saılaý tizimderindegi azamattardyń kvotalanatyn sanattarynyń tizbesin keńeıtýdi usyndy. Atalǵan normalar boıynsha zań jobasy ázirlendi.

6) Joldaýda quqyq qorǵaýshylardyń quqyqtaryn qorǵaý, qylmystyq protsesti jetildirý boıynsha odan ári sharalar qabyldaý qajettigi belgilendi. Sondaı-aq, polıtsııanyń servıstik modelin keńeıtý mindeti qoıyldy. Kelesi jyldan bastap bul tájirıbe búkil elge taratylatyn bolady.

7) Adam quqyqtary jónindegi ýákil ınstıtýtyn júıeli nyǵaıtýdy jáne ólim jazasyn tolyq joıýdy kózdeıtin eki zańnyń ázirlenýi de quqyq qorǵaý salasyndaǵy úlken progreske yqpal etti.

«Bul Memleket basshysynyń saıası reformalar blogy boıynsha eń eleýli bastamalary ǵana. Olardy tolyq iske asyrý úshin bıyl 2 Jarlyq pen 6 Zań qabyldandy.

Jalpy Prezıdent usynǵan barlyq saıası jańashyldyqtar boıynsha aýqymdy ári josparly jumystar júrgizilip jatyr. Sondyqtan saıasat jáne quqyq qorǵaý salalarynda naqty ózgeristerdi júzege asyrý baǵyty 2022 jyly da saqtalady», - deıdi Prezıdent kómekshisi.


Joǵary qaraı