Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

14 sáýir. QazAqparat kúntizbesi

2021 jyldyń 14 sáýir 2021 07:00

NUR-SULTAN. QazAqparat - QazAqparat oqyrman nazaryna 2021 jylǵy 14 sáýirge arnalǵan kúntizbeni usynady.

ESTE QALAR OQIǴALAR

1993 jyly Qazaqstan Respýblıkasynyń Joǵarǵy Keńesi «Jappaı saıası qýǵyn-súrgin qurbandaryn aqtaý týraly» QR zańyn qabyldady. Maqsat - qýǵyn-súrgin qurbandaryn aqtaý, olarǵa tıgizgen moraldyq jáne materıaldyq zalaldy múmkindiginshe óteý. «Qazaqstan Respýblıkasynyń Joǵarǵy Keńesi jappaı saıası qýǵyn-súrginderge ushyraǵan adamdarǵa qatysty ádilettilikti qalpyna keltirýge batyl bel baılap, osy qýǵyn-súrginderdiń barlyq qurbandaryn aqtaý, olarǵa tıgizgen moraldyq jáne materıaldyq zalaldy qazirgi ýaqytta barynsha múmkin bolatyn óteýdi qamtamasyz etý maqsatynda osy Zańdy qabyldaıdy» dep jazylǵan qujatta.

2000 jyly «Qazaqstankaspııshelf» kompanııasy quryldy. 100 myń sharshy metr aýmaqta 26 myń km-den astam seısmıkalyq pishinder ázirlendi. «Qazaqstankaspııshelf» kompanııasy birqatar sheteldik munaı kompanııalaryn tartyp, Kaspıı teńizi boıynsha biregeı halyqaralyq konsortsıým (CSC) quryldy. Zerttelgen munaı qorlary boıynsha Qazaqstan álemdegi 13-shi orynǵa, gaz boıynsha 15-orynǵa shyqty.

2001 jyly Elbasy Nursultan Nazarbaevtyń Almaty oblysynyń ákimshilik ortalyǵyn Taldyqorǵan qalasyna kóshirý týraly Jarlyǵy shyqty. Almaty oblysy Qazaqstan Respýblıkasynyń ońtústik-shyǵys bóliginde ornalasqan. Aýmaǵy 223,9 myń sharshy shaqyrymdy quraıdy. Óńirde 777 eldi meken bar, 103 ult pen ulys ókilderi turady. Oblys quramyna oblysqa baǵynyshty 16 aýdan jáne 3 qala kiredi. Oblys ortalyǵy - Taldyqorǵan qalasy.

2006 jyly Pavlodar qalasyndaǵy №1 kórkemsýret mektebine Halyqaralyq ıÝNESKO klýby mártebesi berildi.

2010 jyly Groznyı qalasyndaǵy №1 lıtseıge Qazaqstan Prezıdenti Nursultan Nazarbaevtyń esimi berildi. Lıtseı atynyń ózgertilýine oraı onyń foıesine Qazaqstan basshysy N. Nazarbaevtyń bıýsti ornatyldy. QR Prezıdenti N. Nazarbaevtyń atynan lıtseıge «Ford» shaǵyn avtobýsy, kitaphana, sondaı-aq kompıýterlik synyp úshin ınteraktıvti taqta tabys etildi.

2010 jyly Azamattyq avıatsııa komıteti Qazaqstanda shyǵarylǵan «Araı» alǵashqy úsh ushaǵyna memlekettik tirkeý týraly kýálikter berdi. Ushaqtar almatylyq «AvıaMaster Eırkraft» shaǵyn kásipornynda kanadalyq lıtsenzııa boıynsha jasaldy. Olardyń tusaýkeseri Almatydaǵy Baıserke aedromynda boldy. Ushaq amerıkalyq Laıkomıng qozǵaltqyshymen jabdyqtalǵan, qarapaıym qazaqstandyq A-95 markaly avtomobıl benzınimen jumys isteıdi.

2014 jyly Ankarada «EKSPO-2017» halyqaralyq kórmesine arnalǵan fotokórme ótti.

2015 jyly Máskeýdegi Halyq sharýashylyǵy jetistikteriniń kórmesi mýzeılik-kórme ortalyǵynda Qazaqstannyń poshtalyq markasy men ulttyq valıýtasyna arnalǵan kórme ashyldy.

2017 jyly vengrııalyq belgili «Madıar Nemzet» basylymynda tanymal saıası jýrnalıst Gabor Shtırdiń respýblıkalyq «Egemen Qazaqstan» basylymynda jaryq kórgen Elbasynyń «Bolashaqqa baǵdar: rýhanı jańǵyrý» atty baǵdarlamalyq maqalasyna silteme jasap jazǵan materıaly jarııalandy. Onda Nursultan Nazarbaevtyń rýhanı jańǵyrýdyń keń aýqymdy baǵdarlamasyn jarııa etkendigi aıtylady. Atalǵan baǵyt aǵylshyn tilindegi pánderdi meńgerýdi jeńildetip, kóptegen pánderdi bastaýysh synyptarda-aq Shekspırdiń tilinde júrgizýge múmkindik bere otyryp, tehnologııalyq jańǵyrýdyń órshil baǵdarlamasyn júzege asyrýǵa yqpal etedi.

2020 jyly EAEO memleketteriniń basshylary Joǵary Eýrazııalyq ekonomıkalyq keńestiń qorytyndylary boıynsha COVID-19 pandemııasyna baılanysty birlesken málimdeme jasady. Onda olar COVID-19pandemııasynyń keri saldaryn joıý, ıntegratsııalyq yntymaqtastyqtyń teris jetkizilgen deńgeıin saqtaý jáne EAEO-ǵa múshe memleketterdiń odan ári ekonomıkalyq damýy, elder arasynda áleýmettik jáne makroekonomıkalyq turaqtylyqty qamtamasyz etý, iskerlik jáne ınvestıtsııalyq belsendilikti qoldaý úshin birlesken jumysty jalǵastyrýǵa daıyn ekendikterin málimdedi.


Basty sózder: Oqıǵa, Qoǵam,
Joǵary qaraı