Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

111 mln teńge jymqyryldy: Atyraý oblysynda Bilim basqarmasynyń eks-sheneýnigi sottaldy

2021 jyldyń 13 qazan 2021 14:52

ATYRAÝ. QazAqparat – Atyraý oblystyq Bilim basqarmasy basshysynyń eks-orynbasary 7 jylǵa sottaldy, dep habarlaıdy QazAqparat tilshisi.

№2 Atyraý qalalyq sotynda oblystyq Bilim basqarmasy basshysynyń burynǵy orynbasaryna qatysty is qaraldy. Basshy orynbasary 2015 jyldan 2020 jylǵa deıin óziniń qyzmettik laýazymyn paıdalanyp, seriktesimen birge bıýdjettiń 111 mln teńgesin jymqyrǵan.

«Osy qarjynyń 54 mln teńgesin ózi alyp, qalǵanyn seriktesi ıelengen. Olar qylmysty ózderine jalaqyny zańsyz esepteý arqyly jasaǵan. Sheneýnik aqshany óziniń bank kartasyna, sondaı-aq anasynyń kartasyna aýdarǵan», - delingen is materıalynda.

Sot tergeýi kezinde sheneýnik óz kinásin moıyndap, ókingen. Ol jymqyrǵan qarjyny tolyq qaıtarǵan. Sot úkim shyǵarý kezinde sottalýshynyń kámeletke tolmaǵan balalary baryn eskergen.

Sheneýnik kináli dep tanylyp, 7 jylǵa bas bostandyǵynan aıyrý jazasyna sottaldy. Oǵan ómir boıyna memlekettik qyzmette jumys isteýge tyıym salyndy. Jazasyn qaýipsizdigi ortasha qylmystyq-túzetý mekemesinde óteýi tıis. Alaıda, sottalýshynyń jas balalary bolýyna baılanysty jazany bes jylǵa keıinge qaldyrýǵa sheshim qabyldanǵan.

Sot úkimi áli zańdy kúshine engen joq.

Eske sala ketelik, budan buryn Atyraý oblysynda emhananyń esepshotynan 70 mln teńgeni jymqyrǵandar sottalǵanyn jazǵan edik.


Joǵary qaraı