Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

11 maýsym. QazAqparat kúntizbesi

2021 jyldyń 11 maýsym 2021 07:00

NUR-SULTAN. QazAqparat - QazAqparat oqyrmandaryna 2021 jylǵy 11 maýsymǵa arnalǵan kúntizbesin usynady.

ESTE QALAR OQIǴALAR

1918 jyly Alash Orda úkimeti Sovet úkimetiniń Qazaqstan aýmaǵyndaǵy barlyq dekretteriniń kúshin joıyp, zańsyz dep jarııalady. Bul týraly Alash Orda úkimetiniń arnaıy qaýlysy qabyldandy. «Alash avtonomııasynyń aýmaǵynda Sovet úkimeti shyǵarǵan barlyq dekretterdiń kúshi joıylsyn. Alash Orda Tóraǵasy Á.Bókeıhanov, Músheleri M.Tynyshbaev, H.Ǵabbasov» delingen qaýlyda.

1991 jyly Qazaqstan Respýblıkasynyń Jańa ekonomıkalyq qurylymdardy qoldaý jáne monopolııalyq qyzmetti shekteý memlekettik komıteti quryldy. Qazaqstan Respýblıkasy Prezıdentiniń 1993 jylǵy qańtardyń 11-indegi Jarlyǵymen atalmysh komıtet Qazaqstan Respýblıkasynyń Monopolııaǵa qarsy saıasat jónindegi memlekettik komıteti bolyp qaıta quryldy.

2002 jyly Soltústik Qazaqstan oblysynyń Tselınnyı aýdanyna Ǵabıt Músirepovtiń esimi berildi. Bul týraly Prezıdenttiń Jarlyǵy shyqty.

2008 jyly Qazaqstan-Frantsııa yntymaqtastyǵyn damytýǵa qosqan súbeli úlesi úshin Nursultan Nazarbaev Frantsııanyń Qurmetti legıon ordeniniń Úlken kresimen nagradtaldy. Úlken krest Frantsııanyń eń joǵarǵy nagradasy – Qurmetti legıon ordeniniń eń bıik marapaty. Ony Frantsııa prezıdenti áskerı nemese azamattyq salada erekshe eńbek sińirgenderge tabys etedi. Ordendi 1802 jylǵy 19 mamyrda memleketti qaıta qurý kezeńinde Napoleon Bonapart bekitken.

2010 jyly Tashkent qalasynda ótken Shanhaı yntymaqtastyq uıymyna múshe elderdiń Memleket basshylary keńesiniń H májilisi aıaqtalǵan soń ShYU-ǵa tóraǵalyq Ózbekstannan Qazaqstanǵa ótti. ShYU-nyń tóraǵasy retindegi Qazaqstannyń is júzindegi qadamdary Uıymǵa múshe elderdiń kópsalaly yntymaqtastyǵyn tereńdetý boıynsha ortaq kúsh-jigerdiń muragerligin qamtamasyz etýge baǵyttaldy.

2012 jyly Qazaqstan Respýblıkasy Úkimetiniń «Teleradıo habar taratý týraly» № 777 qaýlysy bekitildi. Oǵan sáıkes, «Qazteleradıo» AQ Qazaqstan Respýblıkasynda teleradıo habar taratýdyń Ulttyq operatory bolyp belgilendi.

2014 jyly Halyqaralyq kórmeler bıýrosy (HKB) Bas Assambleıasynyń 155-shi sessııasy aıasynda Qazaqstanǵa Halyqaralyq kórmeler bıýrosynyń (HKB) týyn tabystap, EKSPO-2017 kórmesi resmı túrde moıyndaldy.

2014 jyly Soltústik jartyshardaǵy Arystan shoqjuldyzynda qazaqstandyq estrada qaıratkerlerine arnalǵan «Astana juldyzy» paıda boldy.

2014 jyly H. Maqajanova atyndaǵy Qaraǵandy oblystyq travmatologııa jáne ortopedııa ortalyǵy Eýropalyq sapa zertteý qoǵamynyń (ESKR) syılyǵymen marapattaldy. Marapattaý rásimi Brıýsselde (Belgııa) ótti. Klınıkada jyl saıyn jaraqat alǵan jáne tirek-qımyl apparatynyń aýrýlary bar 6 myńnan astam patsıent emdelýde. 2009 jyldan bastap bul jerde jambas jáne tize býyndaryn endoprotezdeý júrgiziledi, 5 jyl ishinde 1 500-den astam ota jasaldy.

2016 jyly Máskeýde «Murager» qazaq aqparattyq-mádenı ortalyǵy qyzmetiniń tanystyrylymy ótti. Ortalyqtyń basty maqsaty - qazaq mádenıeti men ádebıetin dáripteý.

2017 jyly Túrkııa astanasy Ankaranyń Kechıóren aýdanynda aıtys óneriniń dúldúli, aqıyq aqyn Súıinbaı Aronulynyń saıabaǵy janynan Jambyl Jabaev atyndaǵy kóshe saltanatty túrde ashyldy.

2017 jyly Mınskide erler arasynda ótken Eýropa chempıonatynda Taraz qalasynyń 13 jasar turǵyny Bıbisara Asaýbaeva shahmattan erlerdiń halyqaralyq sport sheberi standartyn oryndap, avtomatty túrde Halyqaralyq shahmat federatsııasynyń (FIDE) shahmattan erlerdiń halyqaralyq sport sheberi atandy.

2018 jyly Qazaqstan Respýblıkasynyń Qarýly Kúshterinde (QR QK) alǵash ret áskerı-ǵylymı vzvodqa áskerı qyzmetshilerdi irikteý tájirıbesi bastaldy, irikteýdiń basty krıterııi - aqparattyq tehnologııalar, ǵylym jáne robot tehnıkasy salasynda bilim berý.

2020 jyly Qazaqstanda «Báıterek» Ulttyq basqarý holdınginiń bazasynda qoljetimdi baspana qurylysyn qarjylandyrý, arendalyq baspana usynýmen aınalysatyn, sondaı-aq úleskerler qarajatynyń saqtalýyn qamtamasyz etetin Turǵyn úı qurylysynyń Biryńǵaı operatory quryldy.

Basty sózder: Kúntizbe,
Joǵary qaraı