10 adamdy óltirgen qylmysker ómir boıyna bas bostandyǵynan aıyryldy

ALMATY. QazAqparat –Almatyda 10 adamdy óltirdi dep aıyptalǵan er adam ómir boıyna bas bostandyǵynan aıyryldy, dep habarlaıdy QazAqparat tilshisi.

Almaty qalalyq qylmystyq ister jónindegi mamandandyrylǵan aýdanaralyq sotynyń málimetinshe, S. esimdi er adam 2013 jyly segiz adamdy óltirgeni úshin aıypty dep tanylyp, ómir boıyna bas bostandyǵynan aıyrylǵan. Ol jazasyn «Qara búrkit» qylmystyq-atqarý júıesiniń qaýipsizdigi barynsha joǵary mekemesinde ótep jatyr. Jaqynda onyń taǵy eki áıeldiń ólimine qatysy bar ekeni anyqtalyp, dáleldendi. Osy iske qatysty búgin sot sheshim shyǵardy.

«2001 jyldyń kúzinde S. jábirlenýshiler B. men K.-nyń páterlerin ıemdený maqsatynda olardyń senimine kirgen. Sol jyldyń qazan aıynda B. men K. esimdi áıelderdi jalǵa alǵan úıge shaqyryp, onda ol basqa adamdarmen birge olardy óltirgen. Keıinnen sottalýshy men taǵy basqa adamdar menshik quqyǵynyń qujattaryn ıemdenip, jalǵan senimhattar arqaly páterlerdi satqan», - delingen sottyń habarlamasynda.

Alqabıler sotynyń sheshimimen cottalýshy Qylmystyq kodekstiń 96-baby, 2-bóligi, «a, j, z» tarmaqtary boıynsha kináli dep tanylyp, oǵan qaıtadan ómir boıyna bas bostandyǵynan aıyrý jazasy taǵaıyndaldy.

Úkim zańdy kúshine engen joq.