Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

1 qarashada magıstratýraǵa qujat qabyldaý bastalady

2021 jyldyń 26 qazan 2021 18:15

NUR-SULTAN. QazAqparat - Bıyl 1 qarashada magıstratýraǵa túsý úshin ekinshi márte ótkiziletin keshendi testileýge qujattardy qabyldaý bastalady, dep habarlaıdy QazAqparat Bilim jáne ǵylym mınıstrligine silteme jasap.

Esterińizge sala keteıik, buǵan deıin Bilim jáne ǵylym mınıstri Ashat Aımaǵambetov áleýmettik jelidegi paraqshalarynda magıstratýra men doktorantýraǵa túsý boıynsha qabyldanǵan sheshim týraly habarlady. Endi oqýǵa qabyldaý jylyna eki ret ótkiziledi. Baıqaýǵa jazda grantqa túse almaǵan úmitkerler de, buryn keshendi testileýden ótpegender de qatysa alady.

«Mundaı mańyzdy sheshimderdi qabyldaý kezinde mınıstrlik stýdentterdiń múddesin árqashan birinshi orynǵa qoıady. Buǵan deıin Bilim jáne ǵylym mınıstri Ashat Aımaǵambetov memlekettik grantqa úmitkerler jylyna eki ret, dástúrli túrde – jazda jáne qosymsha qysta testileýden óte alatynyn habarlaǵan. Endi talapkerler 1 qarashadan bastap magıstratýraǵa túsý úshin ekinshi márte ótkiziletin keshendi testileýge qujattaryn tapsyra alady. Testileýdi sátti tapsyrǵan jaǵdaıda úmitkerler jaz aıynda oqýǵa qabyldaý qorytyndysy boıynsha bólingen granttardy utyp ala alady», - dep atap ótti Bilim jáne ǵylym vıtse-mınıstri Qýanysh Erǵalıev.

Endigi kezekte emtıhanǵa tirkelý, mamandyq bólinisinde grant sany týraly aıtyp ótsek. Ekinshi keshendi testileýge qatysý úshin tirkelý QR BǴM Ulttyq testileý ortalyǵynyń app.testcenter.kz saıtynda ótedi. Qujattardy qabyldaý 2021 jylǵy 1-15 qarasha aralyǵynda júrgiziledi. Keshendi testileý 2021 jyldyń 18 qarashasynan 11 jeltoqsanyna deıin ótedi. Magıstratýraǵa grantqa úmitkerler dástúrli túrde shet tili, bilim berý baǵdarlamalary tobynyń beıini boıynsha jáne oqýǵa daıyndyǵyn anyqtaý boıynsha test tapsyrady.

Shet tilin meńgergenin rastaıtyn halyqaralyq sertıfıkaty bar adamdar avtomatty túrde shet tili boıynsha testileýden bosatylady. Test nátıjelerin testileý aıaqtalǵannan keıin birden bilýge bolady. Nátıjesimen kelispegen jaǵdaıda qatysýshy emtıhan aıaqtalǵan soń 30 mınýttan keıin onlaın apellıatsııaǵa ótinish beredi.

Memlekettik bilim berý tapsyrysy boıynsha jáne aqyly negizde ǵylymı-pedagogıkalyq magıstratýraǵa túsý úshin shekti ball – 75, beıindi magıstratýraǵa túsý úshin 50 ball. Magıstratýraǵa bilim berý granttaryn taǵaıyndaý konkýrsyna qatysý úshin qujattar 2021 jylǵy 25 jeltoqsanǵa deıin qabyldanady. Magıstratýraǵa qabyldaý 2021 jylǵy 26 jeltoqsan men 10 qańtar aralyǵynda ótedi. Magıstratýraǵa túsýshiler barlyǵy 3 myńnan astam memlekettik bilim grantyna úmitker bola alady.

Mamandyqtar bólinisinde eń kóp grant «Hımııa» (172 grant), «Veterınarııa» (169), «Mehanıka jáne metall óńdeý» (156), «Metallýrgııalyq ınjenerııa» (137), «Qurylys materıaldaryn, buıymdaryn men konstrýktsııalaryn óndirý» (132 grant), «Materıaltaný jáne jańa materıaldar tehnologııasy» (130) jáne basqa mamandyqtar boıynsha bólindi.


Joǵary qaraı