Об-ҳаво
Астана +7 °С
Алматы +14 °С
Валюта курси
USD 421.58
EUR 496.83
RUB 5.53
CNY 62.20

Давлат раҳбари ҚР Бош вазирини ва Соғлиқни сақлаш вазирини қабул қилди

23 Апрель 2021 17:27

NUR-SULTAN. Kazinform – ҚР Президенти Қасим-Жомарт Тоқаев Бош вазир Асқар Мамин ва Соғлиқни сақлаш вазири Алексей Цойни қабул қилди, деб хабар беради Kazinform Ақорда матбуот хизматига таяниб.

Давлат раҳбарига мамлакатдаги санитария-эпидемиологик вазият, аҳолини эмлаш жараёни, шунингдек, ижтимоий-иқтисодий ривожланишнинг долзарб масалалари тўғрисида маълумот берилди.

Қасим-Жомарт Тоқаевга аҳолини эмлаш бўйича кўрилаётган чоралар тўғрисида маълумот берилди. Асқар Маминнинг сўзларига кўра, апрель ойидан бошлаб ойига 2 миллион кишигача эмлаш имкониятини тақдим этиш режалаштирилган.

Президентга маҳаллий QazVac вакцинасини ҳудудларга етказиб бериш тўғрисида ҳисобот тақдим этилди. Бош вазирнинг сўзларига кўра, Қозоғистон COVID-19га қарши вакцина ишлаб чиқарадиган ўнта давлат ва ўз ишланмаларини рўйхатдан ўтказган бешта мамлакат қаторига кирди. 26 апрелдан бошлаб барча соҳаларда «ASHYQ» дастуридан кенг миқёсда фойдаланиш бошланади. Бу «қизил» ва «сариқ» зоналар пайтида иқтисодиётнинг турли тармоқлари хавфсиз шароитида ишлашга имкон беради.

Давлат раҳбарига тақдим этилган маълумотларга кўра, ҳозирги вақтда юқумли касалликлар шифохонасининг ётоқлари 42 фоизга, интенсив терапия бўлимлари эса 28 фоизга тўлган. Дори воситалари ва шахсий ҳимоя воситаларининг зарурий таъминоти яратилди, ПЗР лабораторияларининг қуввати кунига 123 минг тестгача оширилди. Барча ҳудудларда 25 мингдан зиёд ётоқхона, замонавий ускуналар билан жиҳозланган янги юқумли касалликлар шифохоналари мавжуд.

Асқар Мамин шунингдек, Қасим-Жомарт Тоқаевга 29-30 апрель кунлари бўлиб ўтадиган Евроосиё ҳукуматлараро кенгашининг мажлисига тайёргарлик ҳақида маълумот берди. Бундан ташқари, учрашув давомида инвестицияларни жалб қилиш, аҳоли бандлигини қўллаб-қувватлаш билан боғлиқ масалалар кўтарилди.

Учрашув якунида, Президент Ҳукуматга маҳаллий вакцина ишлаб чиқаришни кўпайтириш ва унинг фуқаролар учун мавжудлигини таъминлаш бўйича ишларни алоҳида назоратга олишни топширди.

Юқорига