Об-ҳаво
Астана +7 °С
Алматы +14 °С
Валюта курси
USD 421.58
EUR 496.83
RUB 5.53
CNY 62.20

Дариға Назарбаева шығармашыл қауымды қазақ комиксін дамытуға шақырды

28 Сентябрь 2021 14:31

НҰР-СҰЛТАН. ҚазАқпарат – Нұрсұлтан Назарбаев қорының директоры Дариға Назарбаева елдегі шығармашыл қауымды қазақ комиксін дамыту ісіне атсалысуға шақырды, хабарлайды ҚазАқпарат тілшісі.

«Бүгін біз мемлекеттік тілді одан әрі дамытатын жұмысты қолға алып отырмыз. Нұрсұлтан Назарбаев қорының жұмысындағы негізгі бағыттардың бірі – мемлекеттік тілді дамыту. Қордың құрылтайшысы да мұны баса тапсырып отыр. Біз үлкен талдау жүргіздік. Мектепке дейінгі, мектеп жасындағы балаларға, жасөспірімдерге арнап жасалған қазақ тіліндегі сапалы дүниелер өте аз. Заманауи ертегілер, мультипликациялар жоқ десе де болады. Жас буынға арналған кітаптар, тарихи дүниелер, фильмдер де жоқ. Жалғыз Balapan арнасы осының бәрінің орнын толтыруға тырысып жатыр. Бірақ оның да дамуына үлкен қолдау керек. Оның ішінде әлеуеті зор жеке әріптестердің инвестициясы қажет. Сондықтан біз осындай салмақты шаруаны қолға алдық», - деді Дариға Назарбаева ҚР Тұңғыш Президент – Елбасы Нұрсұлтан Назарбаев музейінде өткен «Ұлы дала аңызы» атты қазақ комикстерінің тұсауын кесіп тұрып.

Оның айтуынша, қазақ тілді сапалы контенттің аз кезінде қалалы ортада өсіп жатқан, урбанизацияланған балаларға мемлекеттік тілді үйрету оңай болып отырған жоқ.

«Үйімізде қазақша сөйлесіп, балаларымызды қазақша балабақшаларға, қазақ сыныптары мен мектептеріне беріп жатамыз. Бірақ білім ошағы мен үйден тыс жерде орыс тілінің үлесі әлі де басым. Тілі қазақша шыққан балалар орыс тілін өте тез меңгеріп кетіп жатыр. Уақыттың шындығы осы болып тұр. Қазақ тілі жас буынның тілі болып қалыптасуы үшін орта керек. Ол орта балалардың ана тіліне деген қызығушылығын тереңнен қозғап, сүйіспеншілік қалыптастыру керек. Балалар үшін тілдік орта деген бірінші кезекте кітаптар болуы тиіс. Қазір балалар кітап оқымайды деп жиі айтылады. Мен онымен келіспеймін», - деген қор директоры баланың қандай да бір тенденцияға елтуі отбасындағы ортасына да байланысты екенін еске салды.

«Бізге балаларға арналған мультипликациялар, бағдарламалар, фестивальдер керек, қазақ анимациясын дамытуға инвестиция керек. Біз бұл істі комикстерден бастауды жөн көрдік. Ол комикстердің бастауында ұлттық көне аңыздар мен тарихи шығармалар тұр. Енді осыларды толықтырып, жалғастыру үшін талантты адамдарды ортақ іске атсалысуға шақырамыз. Ол адамдардың бізге жаңа, заманауи, соңы жақсылықпен түйінделетін, баланың санасына әділдік пен ізгілік, мейірім мен сұлулық, шынайы махаббат әрдайым жеңетініне сендіре алатын ертегілер әкелуі керек. Бүгінгі көрме осы үлкен істің бастауы ғана», - деді Дариға Назарбаева.


Муаллиф Есімжан Нақтыбай
Калит сўзлар: БАҚ, Қоғам, Тұңғыш Президент - Елбасы, Мәдениет,
Юқорига