Об-ҳаво
Нур-Султон +7 °С
Алматы +14 °С
Валюта курси
USD 449.85
EUR 485.43
RUB 5.71
CNY 70.69

Біртанов ісі: Сотқа 141 том материал түскен

26 Январь 2022 19:29

НҰР-СҰЛТАН. ҚазАқпарат – Нұр-Сұлтан қаласы Сарыарқа аудандық №2 сотында бұрынғы Денсаулық сақтау министрі Елжан Біртановтың ісі бойынша алғашқы алдын ала сот тыңдауы өтті, деп хабарлайды.

Алдын ала тыңдау барысында қорғаушы Серік Сағалиев Елжан Біртановтың өзіне тағылған айыптарды мойындамайтынын айтты.

«Біздің қорғауымыздағы Е.Біртанов сотқа дейінгі тергеу барысында да тағылған айыпты мойындаған жоқ қазір де мойындамайды», - деді ол.

Нұр-Сұлтан қаласы Сарыарқа аудандық №2 сотының судьясы Ибрагим Әлкенов айыпталушы тараптан іс материалдарына қатысты қандай да бір қарсылық, шағымдары бар-жоғын сұрады.

Экс-министр Елжан Біртанов пен оның орынбасары болған Олжас Әбішевтің адвокаттары айыптау материалымен танысып үлгермегенін айтып, құжаттармен толық танысып шығуға мүмкіндік беруді сұрады.

Ал күдікті Олжас Әбішевтің өзі мемлекеттік іс материалының нақты көлемі туралы бүгін ғана шынайы ақпарат алғанын айтты.

«Бүгін мен білетін 133 томнан басқа тағы 4 том бар екенін бірінші рет естіп тұрмын. Бұл мен үшін жаңа мәлімет. Ресми түрде мәлімдегім келеді, неге тергеу органы бұл томдарды жасырып қалған? Мақсаттары қандай болған? 133 том бар деп жүргенбіз. Бүгін тағы 4 том бар деп отыр. Сонда барлығы 137 том болып шығады. Бұл 4 том туралы бізге неге ешкім айтқан жоқ?», - деді Олжас Әбішев.

Судья Ибрагим Әлкенов бұл сұрақты ертеңгі тыңдауда процессуалдық прокурорға қоюға кеңес берді. Оның айтуына қарағанда, Е.Біртановтың ісі бойынша сотқа 141 том материал түскен.

«Сотқа айыптау актілерін қосқанда 141 том материал келіп түсті», - деді судья.

Аталмыш іс бойынша алдын ала тыңдау ертең, яғни, 27 қаңтар күні сағат 15.00-де жалғасатын болды.

Айта кетейік, 17 қаңтарда бұрынғы Денсаулық сақтау министрі Елжан Біртановтың үстінен қозғалған қылмыстық іс сотқа түскені туралы хабар тараған болатын.

Ал 20 қаңтарда аталмыш іс бойынша алдын ала тыңдау 26 қаңтарда өтетіні белгілі болды.

Елжан Біртанов 2020 жылдың 3 қарашасында бюджет қаражатын ысырап етті деген күдікпен қамауға алынған болатын.



Муаллиф Есімжан Нақтыбай
Калит сўзлар: Сот, Медицина, Денсаулық,
Юқорига