Ауа райы
Нур-Султан +7 °С
Алматы +14 °С
валюта бағамы
USD 449.85
EUR 485.43
RUB 5.71
CNY 70.69

Жеке мобильді аударымдарға салық салынбайды

2021 жылдың 28 желтоқсан 2021 15:05

АЛМАТЫ. ҚазАқпарат- Алматы қаласы мемлекеттік кірістер департаменті басшысының орынбасары Орынкүл Қазиева брифинг барысында мобильді аударымдар мен төлемдерге қатысты жиі қойылатын сұрақтарға жауап берді, деп хабарлайды.

Айта кетсек, желтоқсан айында ҚР-да «Салық және бюджетке төленетін басқа да міндетті төлемдер туралы» Кодекске (салық кодексі) түзетулер қабылданды.

Орынкүл Қазиева 2022 жылдың 1 наурызынан бастап ел мен мегаполис тұрғындарына қандай өзгерістер әсер ететінін айтты.

Алматы мемлекеттік кірістер департаментінің өкілі елімізде шағын және орта бизнес соңғы жылдары кәсіпкерлік қызметте жеке тұлғалар арасындағы транзакцияларға арналған жедел мобильді аударымдарды жаппай пайдалана бастағанын атап өтті.

Сондықтан да осы мәселені заңнамалық реттеу үшін «Мобильдік төлемдер» және «мобильдік аударымдар» ұғымы айқындалды.

Мемлекеттік кірістер департаменті басшысының орынбасары атап өткендей, мобильді төлемдерді фискализациялау кез келген адам үшін жаңа салықтың пайда болуын білдірмейді, тек бизнестің қолданыстағы заңнамада қарастырылған салық міндеттемелерін орындауына бағытталған.

«Жалпы, мобильдік аударымдарды пайдалануға қатысты салық заңнамасына енгізілген түзетулер жеке тұлғалардың мобильдік төлемдерден жеке аударымдарын кәсіпкерлік мақсатта жүзеге асырылатын мобильдік төлемдерден бөлуге арналған. Олар бизнес-қоғамдастықпен және банктермен бірнеше рет талқыланды», - деді Орынкүл Қазиева.

Спикер аталған бастамалардың мақсаты цифрлық кеңістікте бизнесті одан әрі дамытуға арналғанын айтты. Қолма-қол есеп айырысуға көшу мақсаттарын көздемейді. Мемлекеттік кірістер органдарына деректерді беруге қатысты барлық алаңдаушылықтар негізсіз.

«Банктерден мәліметтер алу кәсіпкерлік шоттарға түсетін төлемдер бойынша ғана жүргізілетін болады. Осылайша, жеке аударымдарға салық салынбайды. Мобильдік төлемдерге қатысты нормалар 2022 жылғы 1 наурыздан бастап күшіне енеді. Кәсіпкерлік қызмет белгілері бар мобильді төлемдер бойынша деректермен алмасу тек 2025 жылдан бастап жоспарланады»,- деді спикер.

Сонымен қатар, Орынкүл Қазиева екінші деңгейлі банктер мен мемлекеттік органдар арасында жасалған мобильдік аударымдар туралы ақпарат алмасу қалай жүретінін түсіндірді.

«Біріншіден, дара кәсіпкерлер бойынша мобильдік төлемдер жөніндегі мәліметтерді екінші деңгейдегі банктер мемлекеттік кіріс органдарына: ай сайын, E-salyk Business салық режимін қолданатындар бойынша, сондай-ақ қызметті басқа салық режимдерінде жүзеге асырған кезде және осындай мәліметтерді беруге келісім берген кезде; жылына бір рет барлық дара кәсіпкерлер бойынша (пост-терминалдар бойынша мәліметтерді беруге ұқсас, қолданыстағы норма) береді.

Кәсіпкерлер болып табылмайтын жеке тұлғаларға қатысты МКК және екінші деңгейдегі банктер арасында ақпарат алмасу ҚР Ұлттық банкімен, ҚР Қаржы нарығын реттеу және дамыту агенттігімен, Қазақстан қаржыгерлерінің қауымдастығымен және екінші деңгейдегі банктермен бірлесіп әзірлеу жоспарланып отырған критерийлерге сәйкес жүзеге асырылатын болады.

Өлшемдерді бекіту жөніндегі нормативтік құқықтық актінің жобасы жария талқылау үшін «Ашық НҚА» порталында жарияланады»,- деді ол.

Бұдан басқа, мәлімет алмасу жүргізілетін тұлғалар санаттары жеке тұлғалардың жалпыға бірдей декларациялауға кіруіне ұқсас кезең кезеңімен жүзеге асырылады.


Жоғары қарай